రాహుల్ గాంధీ హత్యకు సమాజ్‌వాదీ పార్టీ కుట్ర: అమర్ సింగ్

న్యూఢిల్లీ‌: కాంగ్రెసు నాయకుడు రాహుల్ గాంధీపై హత్యకు దాడి చేయడానికి సమాజ్‌వాదీ పార్టీ ప్రయత్నించిందని సమాజ్‌వాదీ బహిష్కృత నేత అమర్ సింగ్ ఆరోపించారు. ఇటీవలి ఉత్తరప్రదేశ్ పర్యటన సందర్భంగా రాహుల్ గాంధీపై దాడికి సమాజ్‌వాదీ పార్టీ ప్రయత్నించిందని ఆయన అన్నారు. సమాజ్‌వాదీ పార్టీ అధ్యక్షుడు ములాయం సింగ్‌పై, ఆయన అనుచరుడు ఆజంఖాన్‌పై అమర్ సింగ్ వారి పేర్లు ప్రస్తావించకుండా తన ఆగ్రహాన్ని తన బ్లాగ్‌లో వెళ్లగక్కారు.

తన వల్ల ప్రయోజనం నెరవేరగానే తనను వదిలేశారని ఆయన ఆరోపించారు. ప్రముఖ నటి జయప్రద వాహనంపై నల్ల బెలూన్లు విసిరారని, రాహుల్ గాంధీపై హత్యాపూరితమైన దాడికి ఒడిగట్టారని ఆయన అన్నారు. ములాయం సింగ్‌పై పలు ఆరోపణలు చేసిన అమర్ సింగ్ ఆయన పేరు మాత్రం ఎక్కడా ప్రస్తావించలేదు. రాహుల్ గాంధీకి భద్రత కల్పించాల్సిన బాధ్యత ఉత్తరప్రదేశ్ ప్రభుత్వానిదేనని కేంద్ర ప్రభుత్వం అభిప్రాయపడింది.