అమ్మ విజయలక్ష్మిపై పోటీకి ఉత్సాహం: వైయస్ వివేకాపై వైయస్ జగన్

కడప‌: సొంత వదిన విజయలక్ష్మిపైనే పోటీకి తన చిన్నాన్న వైయస్ వివేకానంద రెడ్డి ఉత్సాహం చూపుతున్నారని కడప మాజీ పార్లమెంటు సభ్యుడు వైయస్ జగన్ అన్నారు. కడప జిల్లా పులివెందులలో ఆయన శుక్రవారం ముస్లిం నాయకులను ఉద్దేశించి ప్రసంగించారు. తన అమ్మ వైయస్ విజయలక్ష్మిపై పులివెందుల శానససభా నియోజకవర్గంలో పోటీ చేస్తానని మంత్రి వైయస్ వివేకానంద రెడ్డి అంటున్నారని ఆయన అన్నారు. కాంగ్రెసు అధ్యక్షురాలు సోనియా గాంధీ కోసం విజయలక్ష్మిపై వైయస్ వివేకానంద రెడ్డి పోటీ చేస్తానని అనడం ఎంత వరకు సమంజసమని ఆయన అడిగారు.

వదినపై పోటీ చేయడం ద్వారా వివేకానంద రెడ్డి వైయస్ రాజశేఖర రెడ్డికి ఏం గౌరవం ఇచ్చినట్లని, దానివల్ల వైయస్ రాజశేఖర రెడ్డి ఆత్మ క్షోభించదా అని ఆయన ప్రశ్నించారు. వైయస్ రాజశేఖర రెడ్డి పాలనను వ్యతిరేకించే వారికు బుద్ధి చెప్పాలని ఆయన పిలువునిచ్చారు. బిజెపితో పొత్తు పెట్టుకోబోనని ముస్లిం సోదరులకు మాట ఇస్తున్నట్లు ఆయన తెలిపారు. మాట కోసం తాను పార్లమెంటుకు రాజీనామా చేశానని, సోనియాతో కొట్లాడడానికి వెనకాడడం లేదని ఆయన చెప్పారు.