హోంమంత్రి సబితారెడ్డితో తెలంగాణ ఉద్యోగ సంఘాల ములాఖత్

హైదరాబాద్: రాజకీయ ఐక్య కార్యాచరణ సమితి పిలుపు మేరకు తెలంగాణ ప్రాంత రాజకీయ నాయకులతో మూడు రోజుల ములాఖత్‌లో భాగంగా ఆదివారం తెలంగాణ ఉద్యోగ సంఘాలు హోంమంత్రి సబితారెడ్డిని కలిశారు. ప్రత్యేక తెలంగాణ రాష్ట్ర ఏర్పాటుకు సహకరించాలని కోరారు. రాష్ట్రంలో కేంద్రంలో ఉన్నది కాంగ్రెస్ ప్రభుత్వమే కాబట్టి కేంద్ర ప్రభుత్వంపై ప్రత్యేక తెలంగాణ కోసం ఒత్తిడి తీసుకు రావాలని కోరారు. గతంలో కేంద్ర ప్రభుత్వమే తెలంగాణ ప్రక్రియ ప్రారంభమవుతుందని ప్రకటించిందని కేంద్ర ప్రభుత్వం తమ మాటను నిలబెట్టుకునేలా చూడాలని కోరారు.

కాగా అదిలాబాద్ టిడిపి శాసనసభ్యుడు జోగు రామన్న, బోథ్ శాసనసభ్యుడు నగేష్, మాజీ మంత్రి కడియం శ్రీహరి తదితరులను ఆయా ప్రాంతాల ఉద్యోగ సంఘాల నేతలు కలిసి తెలంగాణ రాష్ట్ర ఏర్పాటుకు సహకరించాలని కోరారు. తెలుగుదేశం పార్టీ తెలంగాణ రాష్ట్ర సాధనకు వ్యతిరేకంగా ఉన్న కారణంగా ఆ పార్టీకి రాజీనామా చేసి రావాలని కోరారు. పదవులకు రాజీనామా చేసి బయటకు వస్తే మళ్లీ గెలిపిస్తామన్నారు.