తెలంగాణ శాఖపై ఇంకా నిర్ణయించలేదు: చంద్రబాబుతో భేటీ అనంతరం నాగం

హైదరాబాద్: తెలంగాణ తెలుగుదేశం పార్టీ ప్రత్యేక శాఖపై పార్టీ అధిష్టానం ఇంకా నిర్ణయం తీసుకోలేదని ఆ పార్టీ సీనియర్ నాయకుడు నాగం జనార్ధన్‌ రెడ్డి సోమవారం స్పష్టం చేశారు. పార్టీ అధ్యక్షుడు చంద్రబాబు నాయుడుతో నాగం భేటీ అయ్యారు. అనంతరం ఆయన విలేకరులతో మాట్లాడారు. అయితే ప్రత్యేక శాఖ విషయంలో పార్టీ అధిష్టానం ఏ నిర్ణయం తీసుకున్నా దానికి తాను కట్టుబడి ఉంటానని చెప్పారు. పార్టీ నిర్ణయమే ఆఖరి నిర్ణయమన్నారు. తాను తెలుగుదేశం పార్టీ వీడుతున్నట్టు గత కొన్ని రోజులుగా వార్తలు వస్తున్నాయని ఆ వాదనల్లో ఎలాంటి నిజం లేదని చెప్పారు. అవన్నీ ఊహాగానాలేనని చెప్పారు.

పార్టీ ప్రత్యేక శాఖ నిర్ణయం తీసుకున్నా, సమన్వయ కమిటీ ఏర్పాటు చేసినా తెలంగాణ టిడిపి ప్రత్యేక తెలంగాణ రాష్ట్ర సాధనకు తీవ్రంగా కృషి చేస్తుందన్నారు. పార్టీలో ఉంటూనే తెలంగాణ సాధనకోసం పోరాడుతామన్నారు. తెలంగాణ టిడిపి నేతలం త్వరలో సమావేశమవుతామని, ఆ సమావేశంలో భవిష్యత్తు కార్యాచరణపై నిర్ణయం తీసుకుంటామని చెప్పారు. పార్టీ అభివృద్ధిలో మా కృషి కూడా ఉందని ఆయన చెప్పారు. కాగా చంద్రబాబుతో భేటీ అయిన నాగం ప్రత్యేక శాఖపై, తెలంగాణ ఉద్యమంపై మాట్లాడినట్టుగా తెలుస్తోంది.