తెలుగువాడి ఆత్మగౌరవాన్ని కాంగ్రెసు తాకట్టు పెట్టింది: హరికృష్ణ

హైదరాబాద్: ఎన్టీఆర్‌ నిలబెట్టిన తెలుగువాడి ఆత్మగౌరవాన్ని కాంగ్రెస్‌ పార్టీ తాకట్టు పెట్టిందని తెలుగుదేశం నాయకుడు, ఎన్టీఆర్ తనయుడు నందమూరి హరికృష్ణ ఆరోపించారు. ఎన్టీఆర్‌ పదిహేనో వర్థంతి సందర్భంగా ఎన్టీఆర్‌ ఘాట్‌లోని ఆయన సమాధి వద్ద పుష్పగుచ్ఛం ఉంచి మంగళవారం ఉదయం నివాళులర్పించారు. ప్రస్తుత కాంగ్రెస్‌ పాలనలో పేదవాడు బతికే పరిస్థితి లేదని, రైతుల ఆత్మహత్యలు విపరీతంగా పెరిగిపోయాయని ఆయన ఆవేదన వ్యక్తం చేశారు. హరికృష్ణతోపాటు రామకృష్ణ, కల్యాణ్‌రామ్‌ తదితరులు ఎన్టీఆర్‌ ఘాట్‌ వద్ద నివాళులర్పించారు.

తండ్రి ఎన్టీఆర్‌కు కేంద్ర మంత్రి దగ్గుబాటి పురంధేశ్వరి కూడా నివాళులు అర్పించారు. ఎన్టీఆర్ ఘాట్‌పై పుష్పగుచ్ఛం ఉంచి ఆమె నివాళులు అర్పించారు. తమ తండ్రి క్రమశిక్షణ, అంకిత భావమే తమను ఈ స్థాయిలో నిలబెట్టిందని ఆమె అన్నారు. వచ్చే జన్మల్లోనూ ఎన్టీఆర్ కూతురిగానే పుట్టాలని కోరుకుంటున్నట్లు ఆమె తెలిపారు.