సిఎం రచ్చబండ తెలంగాణలో రచ్చరచ్చ: మాజీమంత్రి రాంరెడ్డి దామోదర రెడ్డి

హైదరాబాద్: పోలీసుల ప్రమేయం లేకుండా ముఖ్యమంత్రి కిరణ్‌ కుమార్‌ రెడ్డి నిర్వహించాలనుకుంటున్న రచ్చబండ కార్యక్రమాన్ని మంత్రులు ఏర్పాటు చేయాలని మాజీ మంత్రి రాంరెడ్డి దామోదర రెడ్డి మంగళవారం మంత్రులకు సవాల్ విసిరారు. తెలంగాణలో పోలీసుల ప్రమేయం లేకుండా కార్యక్రమాన్ని నిర్వహించే పరిస్థితి లేదని ఆయన అభిప్రాయపడ్డారు. తాను రచ్చబండ కార్యక్రమంలో ఎట్టి పరిస్థితుల్లోనూ పాల్గొనని స్పష్టం చేశారు. తెలంగాణ ప్రత్యేక రాష్ట్రం ప్రకటించే వరకు ముఖ్యమంత్రి తన రచ్చబండ కార్యక్రమాన్ని వాయిదా వేసుకోవాలని ఆయన కోరారు. తెలంగాణ ప్రకటించిన తర్వాత ప్రజలు రచ్చబండను ఆమోదిస్తారని అన్నారు. రచ్చబండ కారణంగా అంతా రచ్చరచ్చ అవుతుందన్నారు. వర్షాల కారణంగా పంట నష్టపోయిన రైతులకు వెంటనే పరిహారం ప్రకటించాలన్నారు.

అలాకాకుండా ముఖ్యమంత్రి రచ్చబండ కార్యక్రమాన్ని తెలంగాణలో నిర్వహించదల్చుకుంటే తెలంగాణ ప్రజలు ఊరుకోరన్నారు. ప్రజాపథంలోనే మమ్మల్ని ప్రజలు తెలంగాణపై నిలదీశారని చెప్పారు. ప్రజాపథంలో పదిశాతం సమస్యలు కూడా తెలంగాణలో పరిష్కారం కాలేదని ఆరోపించారు. శ్రీకృష్ణ నివేదిక తర్వాత తెలంగాణ వస్తుందని మేం చెప్పామని ఇప్పుడు ప్రజలకు ఏం చెప్పాలని ఆయన ప్రశ్నించారు. చిన్నపిల్లల నుండి పండు ముదుసలి వరకు తెలంగాణ కోసం ఎదురు చూస్తున్నారన్నారు. పార్లమెంటు సమావేశంలో తెలంగాణ బిల్లు ప్రవేశ పెట్టాలని ఆయన డిమాండ్ చేశారు. తెలంగాణ కోసం రాజీనామాకు సిద్ధంగా ఉన్నట్లు చెప్పారు.