జగన్‌ తో కాంగ్రెసు‌ పార్టీకి నష్టం లేదు: మంత్రి దానం నాగేందర్

హైదరాబాద్: మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్‌రెడ్డి వల్ల కాంగ్రెసు పార్టీకి ఏ నష్టం లేదని రాష్ట్ర కార్మిక శాఖ మంత్రి దానం నాగేందర్ మంగళవారం అన్నారు. కార్మిక సంఘం సమావేశంలో పాల్గొన్న ఆయన కార్మికసంఘం డైరీని విడుదల చేశారు. ఈ సందర్భంగా ఆయన విలేకరులతో మాట్లాడారు. జగన్ కాంగ్రెసు పార్టీ నుండి వెళ్లినంత మాత్రాన కాంగ్రెసు‌కు వచ్చే నష్టం లేదన్నారు. కాంగ్రెసు ఓటు బ్యాంకు పదిలంగా ఉందన్నారు. ప్రతి వైయస్ అభిమాని 2014లో కాంగ్రెసు పార్టీ గెలవాలని కోరుకుంటున్నారని అన్నారు.

ప్రయివేటు కంపెనీల్లో పని చేసే ఉద్యోగులకు సామాజిక భద్రత కల్పించేందుకు కృషి చేస్తామని ఆయన చెప్పారు. ముఖ్యమంత్రి కిరణ్‌ కుమార్‌ రెడ్డి రచ్చబండ కార్యక్రమాన్ని తెలంగాణవాదులు అడ్డుకుంటామని చెప్పడం సమంజసంగా లేదని ఆయన అన్నారు. రచ్చబండ కార్యక్రమానికి, తెలంగాణవాదానికి సంబంధం లేదన్నారు. రచ్చబండ కార్యక్రమం ప్రజల బాధలు తెలుసుకునేందుకు చేపట్టిన కార్యక్రమం అని చెప్పారు.