నేటి నుండి విశాఖ జిల్లాలో వైయస్ జగన్ రెండవ విడత ఓదార్పు

విశాఖపట్నం: విశాఖ జిల్లాలో మాజీ పార్లమెంటు సభ్యుడు వైయస్ జగన్మోహన్‌రెడ్డి రెండవ విడత ఓదార్పు యాత్ర మంగళవారంనుండి ప్రారంభమవుతోంది. జగన్ హైదరాబాదునుండి నేరుగా రాజమండ్రి వెళతారు. అక్కడినుండి ఓదార్పుకు వెళతారు. జిల్లాలో రెండవ విడత ఓదార్పు పాయకరావుపేటనుండి ప్రారంభమవుతుంది. ఈ ఓదార్పులో జిల్లాలో ఆరుగురిని జగన్ ఓదార్చనున్నారు. ఈరోజు ఇద్దరిని ఓదారుస్తారు. ఓదార్పు యాత్ర ఈ నెల 22వ తేది వరకు జరుగుతుంది. 22న ఓదార్పు యాత్ర పూర్తయ్యాక విశాఖ జగదాంబ సెంటర్లో భారీ బహిరంగ సభను ఏర్పాటు చేస్తారని సమాచారం.

కాగా ఈ నెల 12వ తేది వరకు విశాఖ ఓదార్పుయాత్ర పూర్తి కావాల్సి ఉన్నప్పటికీ న్యూఢిల్లీలో జగన్ జలదీక్ష చేపట్టిన కారణంగా ఓదార్పుయాత్రను అనుకున్న తేదికంటే ముందుగా ఆపేశారు. ఆ తర్వాత ఢిల్లీ జలదీక్ష అయిన తర్వాత ఓదార్పు చేపడతామని ప్రకటించారు. జలదీక్ష తర్వాత విశాఖలో ఈరోజు నుండి ఓదార్పుకు జగన్ సిద్ధమయ్యారు. ఉదయం 10.30 గంటల ప్రాంతంలో ఓదార్పు ప్రారంభమయ్యే అవకాశం ఉంది.