మంత్రివర్గంలో రాష్ట్రానికి మొండిచేయి: జైపాల్‌ రెడ్డి శాఖ మార్పు?

న్యూఢిల్లీ: మంత్రివర్గ విస్తరణలో తమకు అవకాశం వస్తుందని చకోర పక్షుల్లా ఎదురు చూస్తున్న రాష్ట్ర పార్లమెంటు సభ్యులకు కాంగ్రెస్ పార్టీ అధిష్టానం మొండి చేయి చూపే అవకాశం కనిపిస్తోంది. ఇప్పుడున్న 1+4తో ఉన్న మన రాష్ట్రానికి మరో 1+2 వస్తాయని అందరూ భావించారు. తెలంగాణ ఉద్యమం, మాజీ పార్లమెంటు సభ్యుడు వైఎస్ జగన్ సమస్యల నేపథ్యంలో రాష్ట్రానికి ప్రాధాన్యం ఇస్తారనే అందరూ మొదటి నుండి అనుకున్నారు. అయితే అనుకోని విధంగా కాంగ్రెస్ అధిష్టానం మాత్రం రాష్ట్రాన్ని కేర్ చేసే ఉద్దశ్యంతో లేనట్లుగా ఉంది. అందుకే 32 మంది ఎంపీలను ఇచ్చిన రాష్ట్రానికి కేవలం ఐదు మంత్రి పదవులు అందులో నాలుగు సహాయ మంత్రి పదవులే ఇవ్వడం, ఇప్పుడూ అధిష్టానం ఆ దిశలోనే అడుగులు వేస్తుందని వార్తలు రావడంతో రాష్ట్రం పట్ల కాంగ్రెస్ చూస్తున్న చిన్నచూపుకు నిదర్శనంగా భావిస్తున్నారు.

మంత్రివర్గ విస్తరణ ఉంటుందనే సమాచారంతో మధుయాష్కీ, వి హనుమంతరావు, కె కేశవరావు, సర్వే సత్యనారాయణ, అంజన్‌కుమార్‌యాదవ్, కావూరి సాంబశివరావు, రాయపాటి సాంబశివరావు, ఉండవల్లి అరుణ్‌కుమార్, కిషోర్ చంద్రదేవ్ తదితరుల పేర్లు వినిపించాయి. వారు కూడా మంత్రివర్గంలో చోటుపై ఆశలు పెట్టుకున్నారు. కొందరు మంత్రివర్గంలో చోటు కోసం తమతమ ప్రయత్నాలు చేశారు. అయితే అధిష్టానం మాత్రం రాష్ట్రానికి మొండిచేయి చూపింది. కాగా పట్టణాభివృద్ధి శాఖమంత్రిగా ఉన్న జైపాల్‌రెడ్డి శాఖను కూడా మార్చే యోచనలో ఉన్నట్టుగా తెలుస్తోంది. వీరప్ప మొయిలీ శాఖ కూడా మారనున్నట్టుగా తెలుస్తోంది. శాఖ ఇస్తే ఎంపీలకు సోనియానే స్వయంగా పోన్ చేస్తారన్న నేపథ్యంలో ఎంపీలు ఫోన్ కోసం వెయిట్ చేస్తున్నారు.

కాగా కేంద్ర మంత్రివర్గంనుండి వీరభద్రసింగ్, వికె హ్యాండిక్, ఆజాద్, కమల్‌ నాథ్, అంబికాసోనిలను తొలగించనున్నారు. వీరిలో ఆజాద్, కమల్‌ నాథ్, అంబికాసోనిలకు పార్టీ బాధ్యతలు అప్పగించనున్నట్లు సమాచారం. జనార్ధన్‌ ద్వివేదిని మంత్రివర్గంలోకి తీసుకొని, సురేష్ పచౌరీకి ఏఐసిసి బాధ్యతలు అప్పగించే అవకాశం ఉంది. ప్రణబ్, చిదంబరం శాఖలను మార్చాలని మన్మోహన్ కోరినప్పటికీ సోనియాగాంధీ అంగీకరించలేదని తెలుస్తోంది.