చిరంజీవి భేటీకి నలుగురు శానససభ్యులు డుమ్మా, వారిపై చర్యలు

హైదరాబాద్: ప్రజారాజ్యం పార్టీ అధ్యక్షుడు చిరంజీవి బుధవారం ఏర్పాటు చేసిన సమావేశానికి నలుగురు శాసనసభ్యులు డుమ్మా కొట్టారు. శోభానాగిరెడ్డి, కాటసాని రామిరెడ్డిలతో పాటు తెలంగాణకు చెందిన అనిల్ కుమార్, మహేశ్వర రెడ్డి కూడా సమావేశానికి హాజరు కాలేదు. శోభానాగిరెడ్డి, కాటసాని రామిరెడ్డి మాజీ పార్లమెంటు సభ్యుడు వైయస్ జగన్‌తో నడవాలని నిర్ణయం తీసుకున్నారు. దీంతో వారు సమావేశానికి హాజరు కాకూడదని నిర్ణయించకున్నట్లు తెలుస్తోంది. వారిపై చర్య తీసుకునే ఆలోచనలో చిరంజీవి ఉన్నట్లు సమాచారం. వారిపై సస్పెన్షన్ వేటు వేసే అవకాశాలున్నట్లు చెబుతున్నారు.

కాగా, తెలంగాణకు చెందిన అనిల్, మహేశ్వర్ రెడ్డి చిరంజీవి సమైక్యవాదాన్ని వ్యతిరేకిస్తున్నారు. వీరిలో మహేశ్వర రెడ్డికి పార్టీ నుంచి సమావేశానికి రావాలని ఆహ్వానం కూడా అందలేదని తెలుస్తోంది. ఇదివరకు జరిగిన సమావేశంలో మహేశ్వర రెడ్డి శాసనసభ్యులను చీల్చేందుకు ప్రయత్నించారనే ప్రచారం జరిగింది. కర్ణాటక మంత్రి గాలి జనార్దన్ రెడ్డి తరఫున ఆయన మధ్యవర్తిగా వ్యవహరించి ప్రజారాజ్యం శాసనసభ్యులను చీల్చాలని ప్రయత్నించారని చెబుతున్నారు. దీంతో మహేశ్వర రెడ్డిని కావాలనే చిరంజీవి దూరం పెట్టాలని నిర్ణయం తీసుకున్నట్లు సమాచారం. కాగా, ముఖ్యమంత్రి కిరణ్ కుమార్ రెడ్డి ప్రభుత్వంలో ప్రజారాజ్యం ఇప్పటికిప్పుడు చేరే అవకాశాలు లేవని తెలుస్తోంది.