మీడియాపై నాగం బుసబుస, దుష్ప్రచారం చేస్తోందంటూ గుర్రు

హైదరాబాద్: తెలంగాణ కోసం ప్రత్యేక కమిటీ వేయకుంటే శాసనసభ్యులను, నాయకులను కార్యకర్తలకు అప్పగించి తాను అజ్ఞాతంలోకి వెళ్తానని చెప్పిన తెలుగుదేశం పార్టీ తెలంగాణ ప్రాంత నాయకుడు నాగం జనార్దన్ రెడ్డి కొద్దిసేపటికే మాట మార్చారు. తెలంగాణపై తమ పార్టీ అధ్యక్షుడు నారా చంద్రబాబు తేల్చకపోతే తాను అజ్ఞాతంలోకో, అమెరికాకో వెళ్లిపోతానని అన్నట్లు మీడియాలో వార్తలు వచ్చాయి. ఆ వార్తలు వచ్చిన కొద్దిసేపటికే ఆయన మీడియా సమావేశం ఏర్పాటు చేసి తీవ్ర ఆగ్రహం వ్యక్తం చేశారు. మీడియాలో ఓ వర్గం తనపై దుష్ప్రచారం చేస్తోందని ఆయన మండిపడ్డారు.

తాను అజ్ఞాతంలోకి వెళ్లబోనని, ప్రజల్లోకి వెళ్తానని ఆయన అన్నారు. స్వేచ్ఛకోసమే తెలంగాణకు ప్రత్యేక కమిటీ అడుగుతున్నామని ఆయన చెప్పారు. తాను పక్కా తెలంగాణవాదినని ఆయన చెప్పుకున్నారు. పార్టీలకు అతీతంగా పనిచేస్తే తెలంగాణ జెఎసితో కలిసి పనిచేయడానికి తమకు అభ్యంతరం లేదని ఆయన అన్నారు. తన నివాసంలోనో, విజయరామారావు నివాసంలోనో, మరొకరి నివాసంలో తాము కలుసుకోవడం పరిపాటి అని, తమ భేటీలపై వక్రీకరణలు చేయడం తగదని ఆయన అన్నారు.