ముఖ్యమంత్రి రచ్చబండను అడ్డుకోవద్దు: మల్లు భట్టి విక్రమార్క

హైదరాబాద్: ప్రజా సంక్షేమ పథకాలలో ఉన్న లోటుపాట్లను సరిదిద్దడానికే దివంగత ముఖ్యమంత్రి వైయస్ రాజశేఖర రెడ్డి రచ్చబండ కార్యక్రమాన్ని చేపట్టారని మల్లు భట్టి విక్రామార్క గురువారం విలేకరుల సమావేసంలో పేర్కొన్నారు. ప్రజల సమస్యలు తీర్చడానికి ఏర్పాటు చేసినది కాబట్టి రచ్చబండను ఎవరూ అడ్డుకోవద్దని ఆయన కోరారు. రచ్చబండ కార్యక్రమాన్ని తెలంగాణవాదులు వ్యతిరేకించడాన్ని ఆయన తప్పు పట్టారు. ప్రజా సమస్యలను నేరుగా తెలుసుకోవడానికే రచ్చబండ కార్యక్రమమని చెప్పారు. రచ్చబండ కార్యక్రమంలో రేషన్ కార్డులు తదితర ప్రజా సంక్షేమ కార్యక్రమాలపై సిఎం దృష్టి పెడతారన్నారు.

ఈనెల 24నుండి ఫిబ్రవరి 12వరకు రాష్ట్రవ్యాప్తంగా రచ్చబండ కార్యక్రమం ఉంటుందన్నారు. ప్రభుత్వం రేషన్ కూపన్‌లు అర్హులైన వారికి త్వరలో అందిస్తుందన్నారు. ఉపాధి వేతన దినాలను 100 రోజుల నుండి 125 రోజులకు పెంచడంతో పాటు వేతనాన్ని 90 రూపాయలనుండి 120కి పెంచిందన్నారు. పెన్షన్‌ లు, పావలా వడ్డీలు, ఇళ్ల మంజూరు తదితర అంశాలపై కూడా ప్రభుత్వం దృష్టి సారించిందని చెప్పారు. వైయస్ఆర్ అభయహస్తం కింద ఎస్సీ, ఎస్టీ లబ్దిదారులను గుర్తించమని చెప్పారు.