భాను కిరణ్ బాధితుల్లో ప్రముఖ హీరో, 8 కోట్ల రూపాయలు చెల్లింపు?

హైదరాబాద్: మద్దెలచెర్వు సూరి హత్య కేసులో నిందితుడు భాను కిరణ్ వేళ్లు టాలీవుడ్‌లో ఎలా పాతుకుపోయాయో వరుస కథనాలను బట్టి అర్థమవుతోంది. తాజాగా ఓ ప్రముఖ తెలుగు హీరో ఉదంతం కూడా వెలుగులోకి వచ్చింది. ఓ ప్రముఖ తెలుగు హీరో కూడా భాను కిరణ్ బాధితుడని చెబుతూ ఓ ప్రైవేట్ తెలుగు టీవీ చానెల్ ఇందుకు సంబంధించిన వార్తాకథనాన్ని ప్రసారం చేసింది. పొడవాటి ఆ హీరో 15 ఏళ్ల క్రితం ఓ హిట్ సినిమా ఇచ్చాడట. ఇటీవల రెండు భారీ సినిమాలు ఫ్లాప్ అయినట్లు తెలుస్తోంది. దాంతో అతను చిన్నపాటి సినిమాల్లో నటిస్టూ కాలం వెళ్లబుచ్చుతున్నాడని ఆ టీవీ చానెల్ తెలిపింది. ఆ హీరో పేరు మాత్రం బయట పెట్టలేదు.

కాగా, ఓ నిర్మాత తనకు డబ్బులు ఇవ్వాలని హీరోను బలవంతపెట్టాడట. అతను వినకపోవడం నిర్మాత సి. కళ్యాణ్ సాయంతో హీరోను భాను కిరణ్ చెంతకు తీసుకెళ్లాడని సమాచారం. దీంతో అక్కడ సెటిల్మెంట్ జరిగి హీరో 15 కోట్ల రూపాయలు చెల్లించే విధంగా పంచాయతీ జరిగిందని చెబుతున్నారు. దాంతో హీరో తన ఇల్లు తాకట్టు పెట్టి భానుకు 8 కోట్ల రూపాయలు చెల్లించాడని సమాచారం. డబ్బుల చెల్లింపులో కాస్తా జాప్యం జరగడంతో హీరోకు భాను కిరణ్ ఫోన్ చేసి బెదిరించడాని తెలుస్తోంది.