సబితా ఇంద్రారెడ్డి కుమారుడి భూదందాలు, బెదిరింపులు: టిడిపి నేతలు

హైదరాబాద్‌: హోం మంత్రి సబితా ఇంద్రారెడ్డి కుమారుడు కార్తిక్ రెడ్డి భూదందాలు చేస్తున్నారని తెలుగుదేశం నాయకులు తీగల కృష్ణా రెడ్డి, వర్ల రామయ్య ఆరోపించారు. అక్రమ భూదందాలు మీడియాలో వస్తుండడంతో సమాచారం ఎవరిస్తున్నారంటూ కార్తిక్ రెడ్డి అధికారులను కూడా బెదిరిస్తున్నారని వారు శుక్రవారం మీడియా ప్రతినిధుల సమావేశంలో విమర్శించారు. హోంమంత్రి సబితా ఇంద్రారెడ్డి తన అధికారిక నివాసాన్ని హడావిడిగా ఖాళీ చేయటం వెనుక ఆంతర్యం ఏమిటని తెలుగుదేశం వారు ప్రశ్నించారు. అధికారిక నివాసంలో అసాంఘిక కార్యకలాపాలు జరుగుతున్నందునే ఆమె ఈ నిర్ణయం తీసుకున్నారా అని ప్రశ్నించారు.

ఇల్లు ఖాళీ చేసి చేతులు దులుపుకుంటే సరిపోదని నైతిక విలువలు ఉంటే ఆమె తన పదవికి తక్షణం రాజీనామా చేయాలని డిమాండ్‌ చేశారు. ఆమె కుమారుడు కార్తీక్ ‌రెడ్డి, అతని స్నేహితుడు ప్రదీప్‌రెడ్డిని సీసీఎస్‌ పోలీసులముందు హాజరుపరచాలన్నారు. ఆమె ఇంటి ఫోన్‌కాల్స్‌ జాబితాపై విచారణ జరిపించాలన్నారు. హోం మంత్రి సబితా ఇంద్రారెడ్డి ఇంట్లోంచే కార్తిక్ రెడ్డి మిత్రుడు ప్రదీప్ రెడ్డి భానుతో సంబంధాలతో వ్యవహారాలు నడుపుతున్నారనే ఆరోపణలు వచ్చిన విషయం తెలిసిందే.