కోమటిరెడ్డి వెంకటరెడ్డిపైకి చెప్పులు విసిరిన తెలంగాణవాదులు

అదిలాబాద్: మంత్రి కోమటిరెడ్డి వెంకటరెడ్డికి అదిలాబాద్ జిల్లా నిర్మల్‌లో పరాభవం జరిగింది. తెలంగాణ కోసం రాజీనామా చేయాలని డిమాండ్ చేస్తూ ఆయనపైకి తెలంగాణవాదులు చెప్పులు, కోడిగుడ్లు విసిరారు. ఆయనను నిలదీశారు. ఈ సంఘటన శుక్రవారం సాయంత్రం గెస్ట్ హౌస్ వద్ద జరిగింది. శుక్రవారం ఉదయం కూడా తెలంగాణవాదులు మంత్రి వెంకటరెడ్డిని అడ్డుకున్నారు. వివిధ అధికారిక కార్యక్రమాల్లో పాల్గొనడానికి మంత్రి నిర్మల్ వచ్చారు. తెలంగాణవాదుల నుంచి మంత్రిని తప్పించి పోలీసులు హైదరాబాద్ పంపించారు.

కాగా, తాను తెలంగాణ కోసం కట్టుబడి ఉన్నానని, శ్రీకృష్ణ కమిటీ నివేదికలోని ఐదో సిఫార్సును అమలు చేయాలని తాము డిమాండ్ చేస్తున్నామని ఆయన తెలంగాణవాదులకు నచ్చజెప్పే ప్రయత్నం చేశారు. తెలంగాణ సాధన కోసం తాము తీవ్రంగా ప్రయత్నిస్తున్నామని, ఇందులో భాగంగానే తెలంగాణ ప్రాంత మంత్రులు సమావేశమయ్యారని ఆయన చెప్పారు. తెలంగాణ కోసం తాము తమ కాంగ్రెసు పార్టీ అధిష్టానంపై ఒత్తిడి తెస్తామని ఆయన చెప్పారు.