వైయస్ జగన్‌పై ముఖ్యమంత్రి కిరణ్ కుమార్ రెడ్డి ఎదురుదాడి

న్యూఢిల్లీ‌: మాజీ పార్లమెంటు సభ్యుడు వైయస్ జగన్‌పై ముఖ్యమంత్రి కిరణ్ కుమార్ రెడ్డి ఎదురు దాడికి దిగారు. కాంగ్రెసుతో వైయస్ జగన్ అనుబంధం ఏడాది మాత్రమేనని, పార్టీలో జగన్ కన్నా సీనియర్లు చాలా మంది ఉన్నారని ఆయన శనివారం మీడియా ప్రతినిధుల సమావేశంలో అన్నారు. వైయస్ రాజశేఖర రెడ్డి వల్లనో, వైయస్ జగన్ వల్లనో కాంగ్రెసు పార్టీ గెలవలేదని ఆయన అన్నారు. వైయస్ రాజశేఖర రెడ్డి వల్లనే జగన్ ప్రజానాయకుడయ్యాడని ఆయన అన్నారు. రాజీవ్ గాంధీ, సోనియా గాంధీ ప్రోత్సహించడం వల్లనే వైయస్ రాజశేఖర రెడ్డి మాస్ లీడరయ్యారని ఆయన వ్యాఖ్యానించారు. ఎవరి దయాదాక్షిణ్యాల మీదా తన ప్రభుత్వం ఆధారపడి లేదని, కాంగ్రెసు పునాదులు గట్టిగా ఉన్నాయని ఆయన అన్నారు. వైయస్ జగన్ వెంట వెళ్లదలుచుకున్నవారు రాజీనామా చేసి గెలవాలని ఆయన అన్నారు.

వైయస్ రాజశేఖర రెడ్డి కుటుంబానికి గానీ వైయస్ జగన్‌కు గానీ కాంగ్రెసు పార్టీ అన్యాయం చేయలేదని ఆయన చెప్పారు. వైయస్ రాజశేఖర రెడ్డి ఏ రోజు కూడా కాంగ్రెసు నాయకత్వానికి వ్యతిరేకంగా, సోనియాకు వ్యతిరేకంగా మాట్లాడలేదని ఆయన అన్నారు. వైయస్ జగన్‌కు పార్లమెంటు సభ్యుడిగా పార్టీ అవకాశం ఇచ్చిందని, వైయస్సార్‌ను రెండుసార్లు ముఖ్యమంత్రిని చేసిందని, ప్రస్తుత మంత్రిగా ఉన్న వైయస్ వివేకానంద రెడ్డికి ఎమ్మెల్సీగా అవకాశం ఇచ్చిందని, అంతకు ముందు వివేకానంద రెడ్డి పార్లమెంటు సభ్యుడిగా ఉన్నారని ఆయన అన్నారు. కాంగ్రెసు పార్టీ కింద పోటీ చేసి గెలిచిన శానససభ్యులు జగన్ వెంట వెళ్లడం అనైతికమని ఆయన అన్నారు.