నాపై దాడికి కెసిఆర్, కోదండరామ్ కారణం: మంత్రి బస్వరాజ్ సారయ్య

వరంగల్: తనపై తెలంగాణవాదుల దాడికి తెలంగాణ రాష్ట్ర సమితి అధ్యక్షుడు, మహబూబ్‌నగర్ పార్లమెంటు సభ్యుడు కల్వకుంట్ల చంద్రశేఖరరావు, తెలంగాణ రాజకీయ ఐక్య కార్యాచరణ సమితి చైర్మన్ ప్రొఫెసర్ కోదండరామ్లే కారణమని బిసి సంక్షేమ శాఖ మంత్రి బస్వరాజ్ సారయ్య సోమవారం ఆరోపించారు. బిసిని అయిన తనపై కెసిఆర్, కోదండరామ్ దాడి చేయింతి తమ దొరతనాన్ని చాటుకున్నారని అన్నారు. దాడులతో తెలంగాణ రాదని, ఇది సరియైన పద్ధతి కాదని సూచించారు. బిసిని అయినందునే తనపై దాడి చేశారన్నారు.

తెలంగాణ కోసమంటూ రాజీనామాలు చేసి మళ్లీ పోటీ చేయటం వల్ల ప్రయోజనం ఏమీ లేదన్నారు. ప్రజాప్రతినిధులు రాజీనామాలకు బదులు ప్రాణత్యాగం చేయాలని డిమాండ్ చేశారు. ఏడాదిన్నరలో తెలంగాణ వస్తుందన్నారు. రాకుంటే ఎలాంటి త్యాగానికైనా తాను సిద్ధమని చెప్పారు. దాడులు ఎవరు చేసినా అది సరికాదన్నారు. తెలంగాణవాదులపై దాడి చేసిన జగ్గారెడ్డి ప్రవర్తన కూడా సరికాదన్నారు.