తెలంగాణ పోరుకేకలో స్టెప్పులేసిన సిపిఐ రాష్ట్ర కార్యదర్శి నారాయణ

కరీంనగర్: ప్రత్యేక తెలంగాణ రాష్ట్రం సాధించడానికే తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖరరావు పుట్టారని సిపిఐ రాష్ట్ర కార్యదర్శి సోమవారం కరీంనగర్‌లో వ్యాఖ్యానించారు. కరీంనగర్‌లో జరిగిన పోరుకేక కార్యక్రమంలో నారాయణ పాల్గొన్నారు. ఈ కార్యక్రమంలో నారాయణ స్టెప్పులేయడం విశేషం. అదే తెలంగాణ కోసం కెసిఆర్ ఉద్యమిస్తున్నాడు, ఉద్యమిస్తారని అన్నారు. తెలంగాణ ఇస్తామని చెప్పడం వల్లనే 2004లో కాంగ్రెస్ పార్టీతో టిఆర్ఎస్ పొత్తు పెట్టుకున్నదని చెప్పారు. ఆ తర్వాత ఇచ్చిన మాటకు కట్టుబడకుండా తెలంగాణ ఇవ్వక పోవటం వల్ల కాంగ్రెస్‌కు కెసిఆర్ దూరమయ్యారని చెప్పారు.

తెలంగాణవాదాన్ని పక్కదోవ పట్టించడానికే ప్రభుత్వం రచ్చబండ కార్యక్రమాన్ని నిర్వహిస్తోందన్నారు. అయితే రచ్చబండను తెలంగాణ వాదానికి అనుకూలంగా వినియోగించుకోవాలని ఆయన తెలంగాణవాదులకు సూచించారు. తెలంగాణపై కేంద్రం కాలాయాపన చేయవద్దని అన్నారు. టైంపాస్ వ్యవహారాలు మానుకొని తెలంగాణ ప్రకటించాలని డిమాండ్ చేశారు. కాగా ప్రత్యేక తెలంగాణ ప్రభుత్వం వెంటనే ప్రకటించాలని డిమాండ్ చేస్తూ సిపిఐ ఆధ్వర్యంలో పెద్దఎత్తున కార్యకర్తలు వరంగల్, ఖమ్మం, రంగారెడ్డి, హైదరాబాదు జిల్లాలో కలెక్టరేట్లను కూడా ముట్టడించారు.