హైదరాబాదులో తెలంగాణ భవన్ లేకుండా చేస్తాం: ముఖేష్, దానం

హైదరాబాద్: తెలంగాణ రాష్ట్ర సమితి అధ్యక్షుడు కె చంద్రశేఖరరావు కేవలం బలహీనవర్గాలపైనే దాడులు చేయిస్తున్నారని మంత్రి దానం నాగేందర్ సోమవారం ఖైరతాబాద్‌లో పాల్గొన్న రచ్చబండ కార్యక్రమం సందర్భంగా అన్నారు. ప్రజల సమస్యల పరిష్కారం కోసం ఏర్పాటు చేసిన రచ్చబండను అడ్డుకోవడం సరికాదన్నారు. ప్రభుత్వం చేస్తున్న అభివృద్ధిని అడ్డుకునేందుకు చూస్తే తెలంగాణ భవన్‌ను ముట్టడించడం తమకు 24 గంటల పని కాదన్నారు. కెసిఆర్ తీరు ఇలాగే ఉంటే తెలంగాణ భవన్ ముట్టడిస్తామని హెచ్చరించారు.

బస్వరాజు సారయ్య, అనీల్ వంటి బడుగు బలహీన వర్గాల నేతలపైనే కెసిఆర్ దాడులు చేయిస్తున్నారన్నారు. కెసిఆర్ తీరు ఇలాగే ఉంటే తాము ప్రేక్షక పాత్ర వహించేందుకు సిద్ధంగా లేమన్నారు. మీ ఎజెండా మీకు ఉంది కాబట్టి మేం పట్టించుకోలేదు. కానీ అభివృద్ధిని అడ్డుకోవాలని చూస్తే మాత్రం బావుండదని, కెసిఆర్ కబడ్దార్ అంటూ హెచ్చరించారు. కెసిఆర్ తీరు ఇలా ఉంటే తెలంగాణ భవన్ లేకుండా చేస్తామని మరో మంత్రి ముఖేష్ గౌడ్ హెచ్చరించారు. మేం తల్చుకుంటే తెలంగాణ భవన్ ఉండదన్నారు. మంత్రులపై దాడి సరికాదన్నారు.