తేల్చుకుందాం రా, సమావేశాన్ని అడ్డుకుంటాం: కెసిఆర్‌కు జగ్గారెడ్డి సవాల్

మెదక్: తెలంగాణ రాష్ట్ర సమితి అధ్యక్షుడు కె చంద్రశేఖరరావు సోమవారం సదాశివపేటలో నిర్వహించే కార్యక్రమాన్ని అడ్డుకుంటామని సంగారెడ్డి శాసనసభ్యుడు తూర్పు జయప్రకాశ్ రెడ్డి ప్రకటించడంతో ఇప్పుడు అందరి దృష్టి సంగారెడ్డివైపు మరలింది. దానికి తెలంగాణ రాష్ట్ర సమితి సీనియర్ నాయకుడు, సిద్దిపేట శాసనసభ్యుడు హరీష్ ‌రావు కూడా సీరియస్‌గానే స్పందించారు. మేం పార్టీ మీటింగ్ నిర్వహించుకుంటున్నామని, దానికి అనుమతులు కూడా ఉన్నాయని చెప్పారు. మీటింగ్‌ను అడ్డుకుంటే ఎలా స్పందించాలో మాకు తెలుసునన్నారు. జగ్గారెడ్డి, టిఆర్ఎస్‌ల సవాళ్లతో ఇప్పుడు అందరి దృష్టి అటువైపు మరలింది.

కేసిఆర్ సమావేశాన్ని అడ్డుకుంటానని ప్రకటించిన జగ్గారెడ్డి సోమవారం ముంబయి-హైదరాబాద్ రహదారిని పూర్తిగా దిగ్బందించారు. సుమారు నాలుగు కిలోమీటర్ల మేర వాహనాలు నిలిచిపోయాయి. దీంతో ట్రాఫిక్ జాం అయింది. రహదారిపైనే వంటలు చేసి కెసిఆర్‌ను అడ్డుకుంటామని చెబుతున్నారు. కెసిఆర్‌కు తెలంగాణ సెంటిమెంటును ఉపయోగించుకొని రాజీనామాలు చేయడం, మళ్లీ ఎన్నికల్లో పోటీ చేసి గెలవటం తప్ప మరేమీ లేదన్నారు.