రచ్చబండ వాయిదా వేయాలన్న జీవన్‌ రెడ్డి, అడ్డుకోవద్దన్న శ్రీధర్‌ బాబు

కరీంనగర్: ప్రభుత్వం ప్రతిష్టాత్మకంగా ప్రారంభించిన రచ్చబండ కార్యక్రమాన్ని అడ్డోకవద్దని మంత్రి శ్రీధర్‌బాబు కోరగా, అదే పార్టీకి చెందిన మాజీ మంత్రి జీవన్‌రెడ్డి రచ్చబండ కార్యక్రమాన్ని వాయిదా వేయాలని ప్రభుత్వాన్ని సోమవారం డిమాండ్ చేశారు. రచ్చబండ కార్యక్రమం ప్రజల సమస్యను పరిష్కరించే ఉద్దేశ్యంతో ఏర్పాటు చేసిందని మంత్రి శ్రీధర్‌బాబు అన్నారు. రచ్చబండను అడ్డుకుంటే అభివృద్ధిని అడ్డుకున్నట్టేనని అన్నారు. ప్రభుత్వం ప్రజల కోసం ఏర్పాటు చేసే ఏ కార్యక్రమాన్ని అడ్డుకోవద్దని ఆయన సూచించారు. తాను వెళ్లే రచ్చబండ కార్యక్రమానికి ప్రజలు స్వచ్చంధంగా తరలి వస్తున్నారని చెప్పారు.

కాగా మాజీ మంత్రి జీవన్ ‌రెడ్డి రచ్చబండ కార్యక్రమాన్ని వ్యతిరేకించారు. తెలంగాణలో కాంగ్రెసు‌ను బతికించుకోవాలంటే తెలంగాణ ఇవ్వాల్సిందేనని చెప్పారు. రచ్చబండ కార్యక్రమాన్ని కేంద్రం తెలంగాణ ప్రకటించే వరకు వాయిదా వేసుకోవాలని కోరారు. రచ్చబండను వాయిదా వేసుకోవాలని ప్రభుత్వానికి మేం ముందే విజ్ఞప్తి చేసినప్పటికీ పట్టించుకోలేదని అన్నారు. ఈ రోజు జరిగిన పరిణామాలకు ప్రభుత్వమే బాధ్యత వహించాలన్నారు. పార్టీ పరువు తీసేలో ప్రభుత్వం చర్యలున్నాయని అన్నారు.

తెలంగాణ ఉద్యమం కేవలం తెలంగాణ రాష్ట్ర సమితి పార్టీ సొత్తో లేక ఆ పార్టీ అధ్యక్షుడు కె చంద్రశేఖరరావు సొత్తో కాదన్నారు. తెలంగాణ కోసం కాంగ్రెసు పార్టీలోని నేతలు కూడా పోరాటం చేస్తున్నారన్నారు. సంగారెడ్డి ఎమ్మెల్యే జగ్గారెడ్డి తెలంగాణవాదులపై దాడి చేయడం, కెసిఆర్ మీటింగ్‌ను అడ్డుకుంటానని చెప్పడంపైనా జీవన్‌రెడ్డి స్పందించారు. కెసిఆర్, జగ్గారెడ్డిల గొడవ వారి వ్యక్తిగతమన్నారు.