జగ్గారెడ్డిని అరెస్టు చేసిన పోలీసులు: కెసిఆర్‌కు లాస్ట్ వార్గింగ్ అన్న ఎమ్మెల్యే

మెదక్: సదాశివపేటలో తెలంగాణ రాష్ట్ర సమితి ఆధ్వర్యంలో ఏర్పాటు చేసిన సమావేశానికి హాజరయ్చయే ఆ పార్టీ అధ్యక్షుడు కల్వకుంట్ల చంద్రశేఖరరావును అడ్డుకుంటామని హెచ్చరించిన సంగారెడ్డి శాసనసభ్యుడు తూర్పు జయప్రకాశ్ రెడ్డిని పోలీసులు అరెస్టు చేశారు. రచ్చబండను అడ్డుకోవాలని కెసిఆర్ పిలుపు ఇవ్వడంతో జగ్గారెడ్డి సోమవారం జరిగే కెసిఆర్ సభను కూడా అడ్డుకుంటామని ఆదివారం ప్రకటించారు. ఆయన సోమవారం ఉదయమే భారీ సంఖ్యలో వచ్చిన కార్యకర్తలతో హైదరాబాదు-ముంబయి రహదారిని దిగ్బంధించారు. ఈ నేపథ్యంలో భారీగా పోలీసులు మోహరించారు.

జగ్గారెడ్డిని అరెస్టు చేయడానికి తీవ్ర ప్రయత్నాలు చేశారు. అయితే జగ్గారెడ్డి అనుచరులు అడ్డుకోవడంతో ఓ దశలో పోలీసులు లాఠీఛార్జ్ కూడా చేశారు. కార్యకర్తలను చెదరగొట్టి జగ్గారెడ్డిని అరెస్టు చేసి నారాయణ ఖేడ్ పోలీసు స్టేషన్‌కు తరలించారు. ఈ సందర్భంగా జగ్గారెడ్డి కెసిఆర్‌పై నిప్పులు చెరిగారు. కెసిఆర్‌కు ఇది చివరి వార్నింగ్ అన్నారు. కెసిఆర్ మాట వినకుంటే తెలంగాణ భవన్‌ను ముట్టడిస్తామని హెచ్చరించారు.