వైయస్ జగన్‌ను కాంగ్రెసులోకి తెచ్చేందుకు యత్నాలు, కిరణ్ వ్యతిరేక పాత్ర?

హైదరాబాద్: మాజీ పార్లమెంటు సభ్యుడు వైయస్ జగన్‌ను తిరిగి కాంగ్రెసులోకి తెచ్చేందుకు ప్రయత్నాలు సాగుతున్నట్లు అర్థమవుతోంది. కాంగ్రెసు పార్లమెంటు సభ్యుడు సబ్బం హరి మాటలను బట్టి ఆ విషయం తెలుస్తోంది. వైయస్ జగన్‌పై ముఖ్యమంత్రి కిరణ్ కుమార్ రెడ్డి వ్యాఖ్యలపై తీవ్రంగా వ్యతిరేకిస్తూ మాట్లాడిన సందర్బంలో సబ్బం హరి ఆ విషయం అర్థమవుతోంది. వైయస్ జగన్‌ను తిరిగి కాంగ్రెసులోకి తేవడానికి ప్రయత్నాలు జరుగుతున్న నేపథ్యంలో కిరణ్ కుమార్ రెడ్డి చేసిన వ్యాఖ్యలు సరైనవి కావని ఆయన మంగళవారం విశాఖపట్నంలో మీడియా ప్రతినిధుల సమావేశంలో అన్నారు. ఆ ప్రయత్నాలను దెబ్బ తీసే విధంగా కిరణ్ కుమార్ రెడ్డి వ్యాఖ్యలు ఉన్నాయని ఆయన అన్నారు.

సబ్బం హరి కాంగ్రెసులో ఉంటూనే వైయస్ జగన్‌కు మద్దతు తెలుపుతున్నారు. జగన్ పట్ల కొంత మంది రాజకీయ నాయకులు వ్యవహరిస్తున్న తీరు పట్ల ఆయన చాలా కాలంగా ఆవేదన వ్యక్తం చేస్తున్నారు. జగన్ తిరిగి కాంగ్రెసులోకి రాకూడదనే ఉద్దేశంతోనే కిరణ్ కుమార్ రెడ్డి తీవ్రంగా మాట్లాడుతున్నారనే వాదన వినిపిస్తోంది. వి హనుమంతరావు వంటి కాంగ్రెసు సీనియర్ నేతలు కొంత మంది కూడా జగన్‌ను తీవ్రంగా వ్యతిరేకిస్తున్నారు. ఇదే సమయంలో జగన్‌కు చెందిన సాక్షి మీడియాలో కాంగ్రెసుకు, సోనియాకు, రాహుల్‌కు వ్యతిరేకంగా వార్తాకథనాలు వస్తున్నాయి. ఈ స్థితిలో వైయస్ జగన్‌ను తిరిగి పార్టీలోకి తెచ్చే సబ్బం హరిలాంటి ప్రయత్నాలు ఫలిస్తాయా అనేది అనుమానమే.