తెలంగాణ తెచ్చుకోవడం తెలుసు, కెసిఆర్ తెలంగాణను మరిచారు: నాగం

హైదరాబాద్: కేంద్ర ప్రభుత్వం తెలంగాణ ఇవ్వకుంటే ప్రత్యేక రాష్ట్రాన్ని ఎలా సాధించుకోవాలో మాకు తెలుసునని తెలుగుదేశం పార్టీ సీనియర్ నాయకుడు నాగం జనార్ధన్ రెడ్డి మంగళవారం విలేకరుల సమావేశంలో అన్నారు. తెలంగాణ ఉద్యమం ఉవ్వెత్తున ఎగుస్తున్న విషయాన్ని కేంద్రం గమనించాలన్నారు. వెంటనే తెలంగాణ ప్రకటించాలని డిమాండ్ చేశారు. తెలంగాణ రాష్ట్ర సమితి అధ్యక్షుడు కె చంద్రశేఖరరావు నిత్యం తెలుగుదేశాన్ని విమర్శించడం మానుకోవాలన్నారు. తెలుగుదేశం పార్టీనుండి, ఇతర పార్టీలనుండి నేతలను ఎలా లాగుతామా అని యోచనలో ఉండటం కాకుండా ఢిల్లీ వెళ్లి తెలంగాణ సాధించే ప్రయత్నాలు చేయాలన్నారు.

కేంద్రం ప్రభుత్వంపై పార్లమెంటులో బిల్లు పెట్టడానికి ఒత్తిడి తీసుకు రావాలన్నారు. తెలంగాణలో తెలుగుదేశాన్ని నిర్వీర్యం చేద్దామని అనుకున్నా, ఉద్యమంలో టిడిపిని పక్కన పెడుదామని అనుకున్నా ఉద్యమానికి అర్థం ఉండదన్నారు. టిడిపి తెలంగాణ ఫోరం తెలంగాణకు కట్టుబడి ఉందని చెప్పారు. తెలంగామ కోసం అందరం ఐక్యంగా పోరాడాల్సిన అవసరం ఉందన్నారు. ఉద్యోగస్తులు అయినా, తెలంగాణ కోసం పాటుపడే రాజకీయ నాయకులు అయినా కలిసి రావాలని అన్నారు. టిడిపితో ఎవరైనా కలిసి వస్తే పోరాడుతామన్నారు.

కెసిఆర్ పార్టీ బలోపేతంపై దృష్టి పెట్టి తెలంగాణను మరిచారన్నారు. కెసిఆర్ తెలంగాణ కోసం ఢిల్లీ వెళ్లి లాబీయింగ్ చేయాలన్నారు. ప్రభుత్వం రచ్చబండను కొనసాగించడం మంచిది కాదన్నారు. రెండు మూడు రోజుల్లో తెలంగాణ ఉద్యమ కార్యాచరణ ప్రకటిస్తామని చెప్పారు. తెలంగాణపై రాయపాటి, లగడపాటిలు మాట్లాడకుంటే మంచిది అని సూచించారు. సమైక్యాంధ్ర ఉద్యమం కేవలం కొందరి ఆస్తుల పరిరక్షణకే అన్నారు.