కాంగ్రెస్ పిలిచినా పార్టీలోకి వెళ్లే ఆలోచన లేదు: ఎమ్మెల్యే మేకపాటి

హైదరాబాద్: మాజీ పార్లమెంటు సభ్యుడు వైఎస్ జగన్మోహన్ రెడ్డి తిరిగి కాంగ్రెస్ పార్టీలో చేరుతారన్న వ్యాఖ్యలను ఆయన వర్గం ఎమ్మెల్యే మేకపాటి చంద్రశేఖరరెడ్డి బుధవారం కొట్టి పారేశారు. కాంగ్రెస్ పార్టీ అధిష్టానం పిలిచినా కూడా తాము ఆ పార్టీలో చేరేది లేదని స్పష్టం చేశారు. ఎట్టి పరిస్థితుల్లో కాంగ్రెస్‌లో చేరమని ప్రకటించారు. ఆయన జగన్‌తో భేటీ ఆనంతరం విలేకరులతో మాట్లాడారు. ముఖ్యమంత్రి కిరణ్‌కుమార్ రెడ్డి జగన్‌పై చేసిన వ్యాఖ్యలపై సమయం తీసుకొని స్పందిస్తామని చెప్పారు. కానీ ఆయన జగన్‌పై చేసిన వ్యాఖ్యలు మాత్రం సరికావన్నారు.

తమ రాజీనామాకు డిమాండ్ చేస్తున్న కాంగ్రెస్ నేతలు మొదట వారే చేయాల్సి ఉంటుందన్నారు. పార్టీని భ్రష్టు పట్టించిన కాంగ్రెస్ నేతలే మొదట రాజీనామా చేయాలని డిమాండ్ చేశారు. కిరణ్‌కుమార్ రెడ్డి కూడా అధిష్టానం వ్యక్తి అని చెప్పారు. ఆయన మాటల వెనుక అధిష్టానం అనుమతి ఉండి ఉంటుందన్నారు. తాము జగన్‌తో సమావేశమయింది జగన్ పార్టీ విధివిధానాలపై చర్చించడానికని చెప్పారు.