బాలకృష్ణ తడాఖా: సినిమా షూటింగ్ కోసం రిజర్వాయర్ పూడ్చివేత

విశాఖపట్నం‌: విశాఖపట్నంలో ప్రకృతిని నాశనం చేసే పనికి ఓ సినిమా యూనిట్ పూనుకుంది. విశాఖపట్నం జిల్లాలోని చమురుగడ్డ రిజర్వాయర్‌ను పూడ్చివేయడానికి, చెట్లను నరికేయడానికి, కొత్త నిర్మాణాలు చేపట్టడానికి యూనిట్ రంగంలోకి దిగింది. ఇప్పటికే చాలా వరకు తమ పని పూర్తి చేసుకుంది. తెలుగు సినీ హీరో బాలకృష్ణ సినిమా షూటింగ్ కోసం ఏర్పాటు చేశారు. అభయారణ్యంలో సినిమా నిర్మాణం కోసం కట్టడాలు నిర్మించారు, రోడ్లు వేశారు, చెక్ పోస్టు ఏర్పాటు చేశారు. షూటింగ్ కోసం అధికారుల నుంచి అనుమతి పొందిన సినిమా యూనిట్ చమురుగడ్డ రిజర్వాయర్‌ను పూడ్చేసే పని చేస్తోంది. ఈ విషయాన్ని ఓ తెలుగు టీవీ చానెల్ బయటపెట్టింది.

సినిమా షూటింగుకు అధికారులు అనుమతి ఇచ్చారు. రోజుకు ఐదు వేల అద్దె చెల్లించే విధంగా ఒప్పందం కుదిరింది. అయితే, ఏ విధమైన మార్పులు చేయకుండా ఉన్న వాతావరణం, పరిస్థితుల్లోనే షూటింగ్ నిర్వహించుకోవాల్సి ఉంటుంది. అభయారణ్యంలో ఏ విధమైన నిర్మాణాలు చేపట్టకూడదని, చెట్లు నరక్కూడదనే నిబంధనలను ఉల్లంఘించి షూటింగుకు ఏర్పాట్లు చేసుకుంటున్నారు. ఈ విషయం తెలిసిన పర్యావరణవేత్తలు ఉద్యమానికి సన్నద్ధమవుతున్నారు. ఇప్పటికే కేంద్ర పర్యావరణ శాఖ మంత్రికి వారు ఫిర్యాదు చేశారు. ఇంత జరుగుతున్నా తమకేమీ తెలియదని అధికారులు బుకాయిస్తున్నారు. తాము షూటింగుకు అనుమతి ఇచ్చామే తప్ప అభయారణ్యంలో ఇతరేతర కార్యకలాపాలకు అనుమతి ఇవ్వలేదని వారంటున్నారు.