కిరణ్‌ను విమర్శించిన ఎంపీ సబ్బం హరిపై విశాఖ ఎమ్మెల్యేల ఫైర్

విశాఖపట్టణం: ముఖ్యమంత్రి కిరణ్‌కుమార్ రెడ్డిని విమర్శించిన అనకాపల్లి పార్లమెంటు సభ్యుడు, జగన్ వర్గం నేత సబ్బం హరిపై విశాఖ శాసనసభ్యులు, ఆ జిల్లా మంత్రి తీవ్రస్థాయిలో బుధవారం ఫైర్ అయ్యారు. మంత్రి బాలరాజు, ఎమ్మెల్యేలు ద్రోణంరాజు శ్రీనివాస్, తైనాల విజయ్ కుమార్ తీవ్రస్థాయిలో సబ్బం హరిపై విరుచుకు పడ్డారు. ముఖ్యమంత్రి ప్రతిష్టను దెబ్బతీసేందుకే సబ్బం హరి ఇష్టారాజ్యంగా వ్యాఖ్యానిస్తున్నారని మంత్రి బాలరాజు అన్నారు.

ఎంపీ పదవికి సబ్బం అనర్హుడు అని ఎమ్మెల్యే ద్రోణంరాజు శ్రీనివాస్ అన్నారు. ఆయన పేరును కూడా మేం ఉచ్చరించమని చెప్పారు. మరో ఎమ్మెల్యే తైనాల విజయ్ కుమార్ మరో అడుగు ముందుకేసి సబ్బం హరి వెంటనే రాజీనామా చేయాలని డిమాండ్ చేశారు. ఆయన కాంగ్రెస్ పార్టీనుండి గెలవలేదనుకుంటే వెంటనే రాజీనామా చేసి కాంగ్రెస్ జెండా లేకుండా మళ్లీ పోటీ చేయాలన్నారు. ఆయన పోటీ చేసి గెలిస్తే గుండు గీయించుకొని తిరుగుతానని సవాల్ చేశారు. కాంగ్రెస్ పార్టీకి వైఎస్ జగన్ దూరం కావడంలో సబ్బం హరి పాత్ర కూడా ఉందని ఆయన అభిప్రాయం వ్యక్తం చేశారు.