బలపరీక్షకు ముందుకు రా!: కిరణ్ కుమార్ రెడ్డికి హరీష్ సవాల్

హైదరాబాద్: తమ పార్టీపై ముఖ్యమంత్రి కిరణ్ కుమార్ రెడ్డి చేసిన వ్యాఖ్యలకు తెలంగాణ రాష్ట్ర సమితి (తెరాస) శాసనసభ్యుడు హరీష్ రావు శనివారం మీడియా ప్రతినిధుల సమావేశంలో తీవ్రంగా ప్రతిస్పందించారు. తమ పార్టీకి 11 సీట్లు కూడా తదుపరి ఎన్నికల్లో రావని ముఖ్యమంత్రి అనడాన్ని ఆయన తప్పు పట్టారు. ముందు కాంగ్రెసు పార్టీ బలమేమిటో తెలుసుకోవాలని ఆయన కిరణ్ కుమార్ రెడ్డినుద్దేశించి అన్నారు. ముఖ్యమంత్రి ముందు శాసనసభలో విశ్వాస తీర్మానం పెట్టుకుని బలాన్ని నిరూపించుకోవాలని ఆయన సవాల్ చేశారు. తాము తప్పకుండా ప్రభుత్వానికి వ్యతిరేకంగా ఓటేస్తామని ఆయన చెప్పారు.

తాము 11 మంది శాసనసభ్యులమే కావచ్చు గానీ తమ వెంట 4 కోట్ల మంది తెలంగాణ ప్రజలున్నారని ఆయన అన్నారు. మీ బలమేమిటో తేల్చుకోవాలనుకుంటే మీ శాసనసభ్యులతో రాజీనామాలు చేయించు, మేమూ రాజీనామాలు చేస్తాం, ప్రజల్లోకి వెళ్తే ఎవరి బలమేమిటో తెలుస్తుంది అని హరీష్ రావు అన్నారు. కాంగ్రెసు పార్టీకి డిపాజిట్లు దక్కవని ఆయన అన్నారు. కావాలంటే ఉప ఎన్నికల ఫలితాలు చూసుకోవచ్చునని ఆయన అన్నారు. పిసిసి అధ్యక్షుడు డి. శ్రీనివాస్ చిత్తుగా ఓడిపోయారని ఆయన గుర్తు చేశారు.