రాజాపై పాటిల్ ఏం చెప్పారు?: 2జి స్కామ్‌పై సిబాల్‌కు నివేదిక సమర్పణ

న్యూఢిల్లీ: 2జి స్పెక్ట్రమ్ కుంభగకోణంపై జస్టిస్ శివరాజ్ పాటిల్ నేతృత్వంలోని ఏకసభ్య కమిటీ టెలికం మాజీ మంత్రి ఎ. రాజాపై ఏం తేల్చిందనేది ఆసక్తికరంగా మారింది. 2జి స్పెక్ట్రమ్ కుంభకోణంలో రాజా తన మంత్రి పదవికి రాజీనామా చేసిన విషయం తెలిసిందే. కుంభకోణంపై విచారణకు కేంద్ర ప్రభుత్వం జస్టిస్ శివరాజ్ పాటిల్‌ కమిటీని ఏర్పాటు చేసింది. శివరాజ్ పాటిల్ తన నివేదికను సోమవారం టెలికం మంత్రి కపిల్ సిబాల్‌కు సమర్పించారు.

స్పెక్ట్రమ్ కుంభకోణంలో అవకతవకలకు పాల్పడిన అధికారుల పేర్లను తాను ఇచ్చినట్లు జస్టిస్ శివరాజ్ పాటిల్ చెప్పారు. సకాలంలో విచారణ పూర్తి చేసిన శివరాజ్ పాటిల్‌ను కపిల్ సిబాల్ అభినందించారు. నివేదికను ప్రభుత్వం విస్తృతంగా పరిశీలించి సిఫార్సులను పరిగణనలోకి తీసుకుంటుందని ఆయన చెప్పారు. పత్రాల సేకరణలో తనకు ఏ విధమైన ఇబ్బందులు ఎదురు కాలేదని పాటిల్ చెప్పారు.