బెంగళూర్ ఎన్‌కౌంటర్‌లో హైదరాబాద్ రౌడీషీటర్ నాగిరెడ్డి హతం

బెంగళూరు: బెంగళూర్‌లోని రామ్మూర్తినగర్‌లో హైదరాబాదుకు చెందిన రౌడీషీటర్ పోలీసులతో జరిగిన ఎదురు కాల్పుల్లో హతమయ్యాడు. పక్కా సమాచారంతో పోలీసులు నాగిరెడ్డి కారును వెంబడించినట్లు, ఆ సమయంలో నాగిరెడ్డి పోలీసుల పైకి కాల్పులు జరిపినట్లు, పోలీసులు ఎదురు కాల్పులు జరిపినట్లు, ఈ ఎదురుకాల్పుల్లో నాగిరెడ్డి హతమైనట్లు తెలుస్తోంది. నాగిరెడ్డిపై ఆరు హత్య కేసులున్నాయి.

కర్ణాటకలో నాగిరెడ్డిపై ఐదు హత్య కేసులున్నాయి. ఆంధ్రప్రదేశ్‌లోని విశాఖపట్నంలో ఓ హత్య కేసు నమోదై ఉంది. ఓ సాఫ్ట్‌వేర్ ఇంజనీర్ హత్య కేసులో కూడా నాగిరెడ్డి నిందితుడు. నాగిరెడ్డిని గతంలో అరెస్టు చేసి బెల్గాం జైల్లో పెట్టినట్లు తెలుస్తోంది. ఆ తర్వాత అతను యుకెకు పారిపోయాడని సమాచారం. యుకె నుంచి తిరిగి వచ్చిన నాగిరెడ్డి బెంగళూర్‌లో సంచరిస్తున్నట్లు పోలీసులు సమాచారం అందుకుని వేటాడినట్లు తెలుస్తోంది.