వైయస్ జగన్‌ను ఏమీ చేయలేరు, చిరంజీవి బలిపశువు: కొండా సురేఖ

వరగంల్: తమ నేత వైయస్ జగన్‌ను ఏ శక్తీ ఏమీ చేయలేదని, ప్రజారాజ్యం పార్టీ అధ్యక్షుడు చిరంజీవి భవిష్యత్తులో బలిపశువు అవుతారని కాంగ్రెసు శాసనసభ్యురాలు, మాజీ మంత్రి కొండా సురేఖ అన్నారు. ప్రజారాజ్యం పార్టీతో కాంగ్రెసు పొత్తు వార్తలపై ఆమె మంగళవారం మీడియా ప్రతినిధుల సమావేశంలో ప్రతిస్పందిస్తూ ఆ విధంగా అన్నారు. వైయస్ జగన్‌కు చెక్ పెట్టడానికే కాంగ్రెసు చిరంజీవితో పొత్తు పెట్టుకుంటుందనే వార్తలపై ఆమె ఆ విధంగా అన్నారు. వైయస్ జగన్‌ను ఎవరూ ఏమీ చేయలేరని ఆమె అన్నారు.

చిరంజీవితో పొత్తు పెట్టుకోవడమంటే కాంగ్రెసు అధిష్టానం తెలంగాణ అంశాన్ని పక్కన పెట్టినట్లేనని ఆమె వ్యాఖ్యానించారు. తనపై అనర్హత వేటు పడినా తాను భయపడేది లేదని, దానిపై కోర్టుకు వెళ్తానని ఆమె అన్నారు. తమపై అనర్హత వేటు వేస్తే కాంగ్రెసును, ముఖ్యమంత్రిని తప్పు పట్టిన మంత్రి శంకరరావుపై కూడా అనర్హత వేటు పడాలని ఆమె అన్నారు. కాంగ్రెసు పార్టీ ఎప్పుడైనా ఎవరినైనా వాడుకుంటుందని, ఎప్పుడైనా ఎవరినైనా దూరం పెడుతుందని ఆమె వ్యాఖ్యానించారు.