సమైక్యవాది చిరంజీవితో పొత్తేమిటి, బ్లాక్ మెయిల్ చేయరా?: నాగం

న్యూఢిల్లీ: సమైక్యవాది అయిన ప్రజారాజ్యం పార్టీ అధినేత చిరంజీవితో కాంగ్రెసు పొత్తు పెట్టుకోవడాన్ని తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి వ్యతిరేకించారు. తెలంగాణకు వ్యతిరేకించడానికే చిరంజీవితో పొత్తు పనికి వస్తుందని ఆయన మంగళవారం మీడియా ప్రతినిధుల సమావేశంలో విమర్శించారు. కాంగ్రెసు ఒకవేళ తెలంగాణకు అనుకూలంగా నిర్ణయం తీసుకుంటే, దాన్ని వ్యతిరేకిస్తూ చిరంజీవి బ్లాక్ మెయిల్ చేయరనే గ్యారంటీ ఏమీ లేదని ఆయన అన్నారు. చిరంజీవితో పొత్తును కాంగ్రెసు తెలంగాణ ప్రాంత నాయకులు వ్యతిరేకించాలని ఆయన కోరారు. తెలంగాణ రాష్ట్ర ఏర్పాటుకు పార్లమెంటులో బిల్లు పెట్టించాల్సిన బాధ్యత కాంగ్రెసు తెలంగాణ నాయకుల మీదనే ఉందని ఆయన అన్నారు.

తెలంగాణను మొదటి నుంచీ కాంగ్రెసు పార్టీ మోసం చేస్తోందని ఆయన విమర్సించారు. పెద్ద మనుషుల ఒప్పందాన్ని, ముల్కీ నిబంధనలను, ఆరు సూత్రాల పథకాన్ని, ఇతర ఒప్పందాలను కాంగ్రెసు ప్రభుత్వాలు ఉల్లంఘిస్తూ వచ్చాయని ఆయన విమర్సించారు. తెలంగాణను అభివృద్ధి చేయాలనే చిత్తశుద్ధి ఉంటే ఒక్క రచ్చబండతోనే అభివృద్ధి జరిగిపోతుందా అని ఆయన ప్రశ్నించారు.