జగన్ బయటకు పంపి, కాంగ్రెసు‌ను తిట్టిన పీఆర్పీతో పొత్తా: మారెప్ప

హైదరాబాద్: కాంగ్రెసు పార్టీ నేతల పంచెలు ఊడదీసి కొడతామన్న ప్రజారాజ్యం పార్టీతో పొత్తు పెట్టుకోవడం ఏమిటని మాజీ మంత్రి మారెప్ప బుదవారం ప్రశ్నించారు. గత సాధారణ ఎన్నికలకు ముందు ప్రజారాజ్యం పార్టీ వ్యవస్థాపక అధ్యక్షులు చిరంజీవి తమ్ముడు పవన్ కళ్యాణ్ కాంగ్రెసు నేతలను పంచెలూడదీసి కొడతామన్నాడని, ఇప్పుడు అదే పార్టీ నేతలతో కలవడం ఏమిటని మారెప్ప పార్టీ అధిష్టానాన్ని ప్రశ్నించారు. ఏఐసిసి అధ్యక్షురాలు సోనియాగాంధీపై కాంగ్రెసు పార్టీ సీనియర్ నాయకుడు వెంకటస్వామి చేసిన ఆరోపణలు వాస్తవమేనని అన్నారు.

కాకాను సిడబ్లూసి పదవినుండి తొలగించడం శోచనీయమన్నారు. కాకా వ్యాఖ్యలతో తాను ఏకీభవిస్తున్నట్టు చెప్పారు. దివంగత ముఖ్యమంత్రి వైయస్ రాజశేఖరరెడ్డి తనయుడు, మాజీ పార్లమెంటు సభ్యుడు వైయస్ జగన్మోహన్ రెడ్డిని కాంగ్రెసు పార్టీనుండి పంపించి రాష్ట్రంలో పార్టీకి దిక్కులేకుండా చేశారని మారెప్ప అధిష్టానంపై విరుచుకు పడ్డారు.