ఇలాంటి సమయంలోనా: వెంకటస్వామిపై ఎమ్మెస్సార్ మండిపాటు

కరీంనగర్: ఏఐసిసి అధ్యక్షురాలు సోనియా గాంధీపై కాంగ్రెసు సీనియర్ నాయకుడు వెంకటస్వామి చేసిన వ్యాఖ్యలను ఆర్టీసీ చైర్మన్ ఎం.సత్యనారాయణ ఖండించారు. సోనియాను విదేశీ అని ప్రశ్నించిన ఎందరో మళ్లీ కాంగ్రెసు పార్టీలోకి వచ్చారని ఎమ్మెస్సార్ అన్నారు. శరద్ పవార్ సోనియాను తీవ్రంగా విమర్శించి మళ్లీ కాంగ్రెసు పంచన చేరారని చెప్పారు. పదవులలో ఉన్నప్పుడు గుర్తుకురాని సోనియా విదేశీయత ఇప్పుడు గుర్తుకు వచ్చిందా అని ప్రశ్నించారు. కాకా తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖరరావు ఇంటికి వెళితే తప్పులేదు. కానీ ఆంటోని ప్రజారాజ్యం పార్టీ అధ్యక్షుడు చిరంజీవి ఇంటికి వెళితే తప్పా అని ప్రశ్నించారు.

కాంగ్రెసు ప్రభుత్వం కష్టాలలో ఉన్నందువల్లే అధిష్టానం పొత్తుల విషయంలో ముందుకు వచ్చింది. పరిస్థితులు బాగా లేని సమయంలో కాకా ఇలా మాట్లాడటం సరికాదన్నారు. పొత్తులపై ఏవైనా అభ్యంతరాలుంటే వేరే వేదికపై మాట్లాడలన్నారు. కానీ ఇలా బహిరంగంగా మాట్లాడటం పద్ధతి కాదన్నారు. కాకా తొందరపడి వ్యాఖ్యలు చేశారన్నారు. ఆయన వ్యాఖ్యలు అసందర్భంగా ఉన్నాయన్నారు. ఎందుకు తొందరపడి వ్యాఖ్యలు చేశారో తెలియదన్నారు.