17 నుంచి సహాయ నిరాకరణ, తెలంగాణ సాధిస్తాం: కోదండరామ్

హైదరాబాద్: ఈ నెల 17వ తేదీ నుంచి సహాయ నిరాకరణ ఉద్యమాన్ని ప్రారంభిస్తున్నట్లు తెలంగాణ రాజకీయ జెఎసి చైర్మన్ కోదండరామ్ చెప్పారు. పార్లమెంటు బడ్జెట్ సమావేశాల్లో తెలంగాణ రాష్ట్ర ఏర్పాటుకు ఈ ఉద్యమాన్ని ప్రారంభిస్తున్నట్లు ఆయన తెలిపారు. ముఖ్యమంత్రి కిరణ్ కుమార్ రెడ్డిని తెలంగాణ జెఎసి నేతలు శనివారం ఉదయం కలిసి అందుకు సంబంధించిన నోటీసు ఇచ్చారు. ముఖ్యమంత్రితో భేటీ అనంతరం కోదండరామ్ మీడియా ప్రతినిధులతో మాట్లాడారు. తమ నోటీసుకు ముఖ్యమంత్రి నుంచి సరైన స్పందన రాలేదని, సరేనని మాత్రమే అన్నారని ఆయన చెప్పారు. తాము చెప్పాల్సింది చెప్పామని, తర్వాత జరిగే పరిణామాలకు ప్రభుత్వమే బాధ్యత వహించాల్సి ఉంటుందని ఆయన అన్నారు.

తమ సహాయ నిరాకరణ ఉద్యమం శాంతియుత పద్ధతుల్లోనే ఉంటుందని, అయితే ప్రభుత్వమే హింసకు పాల్పడుతోందని ఆయన అన్నారు. ప్రభుత్వం విచ్చలవిడిగా వ్యవహరిస్తోందని, నిజామాబాద్, ఆదిలాబాద్ జిల్లాల బంద్‌కు తాము ఈ రోజు పిలువునిస్తే నిన్నటి నుంచే అరెస్టులు జరుగుతున్నాయని ఆయన చెప్పారు. ప్రజలను దూరం పెట్టి ముఖ్యమంత్రి పోలీసుల మధ్య రచ్చబండ నిర్వహిస్తున్నారని ఆయన విమర్శించారు. స్వాతంత్ర్య ఉద్యమంలో అన్ని వర్గాల ప్రజలు పాల్గొన్నట్లే తెలంగాణ రాష్ట సాధనకు జరిగే ఉద్యమంలో అన్ని వర్గాలు పాల్గొంటాయని, తెలంగాణ సాధించి తీరుతామని ఆయన అన్నారు. సహాయ నిరాకరణ ఉద్యమానికి తెలంగాణలోని అన్ని వర్గాలు సమాయత్తమవుతున్నాయని ఆయన చెప్పారు.