కాంగ్రెస్ చిన్న రాష్ట్రాలకు అనుకూలం కాదు, మీడియా సృష్టి: కోటగిరి

హైదరాబాద్: కాంగ్రెస్ పార్టీ ఎప్పుడు కూడా చిన్న రాష్ట్రాలకు తాము అనుకూలమని ప్రకటించలేదని ప్రజారాజ్యం పార్టీ సీనియర్ నాయకుడు కోటగిరి విద్యాధరరావు ఆదివారం విలేకరులతో అన్నారు. కాంగ్రెస్ చిన్న రాష్ట్రాలకు అనుకూలం అనేది కేవలం మీడియా సృష్టి అన్నారు. ప్రత్యేక రాష్ట్రానికి కాంగ్రెస్ అనుకూలం అయితే దేశంలో 11 రాష్ట్రాల్లో చిన్న రాష్ట్రాల డిమాండ్లు ఉన్నాయన్నారు. వాటినన్నింటిని కాంగ్రెస్ పరిష్కరించవలసి ఉంటుందన్నారు. తెలంగాణ ప్రకటించడానికి కాంగ్రెస్ సిద్ధమైతే మరిన్ని డిమాండ్లు వస్తాయని చెప్పారు.

కాంగ్రెస్-ప్రజారాజ్యం పార్టీ పొత్తుపై కాంగ్రెస్ పార్టీ సీనియర్ నాయకుడు వెంకటస్వామి వ్యాఖ్యలు చేయడం దురదృష్టకరమన్నారు. విలీనానికి కాంగ్రెస్ అధిష్టానం నిర్ణయం తీసుకున్న తర్వాత ప్రతి కాంగ్రెస్ కార్యకర్త దానిని ఆమోదించవలసి ఉంటుందన్నారు. విలీనంపై అభ్యంతరాలు వ్యక్తం చేయడం సరికాదన్నారు. అందరూ అధిష్టానం నిర్ణయానికి కట్టుబడి ఉండాల్సిందేనన్నారు. పార్టీలో ఉండి అన్ని ప్రతిఫలాలు పొందిన తర్వాత ఇప్పుడు కాంగ్రెస్ పార్టీ అధిష్టానం నిర్ణయంపై అభ్యంతరాలు వ్యక్తం చేయడం సమంజసం కాదన్నారు.

కాగా ఏఐసిసి అధ్యక్షురాలు సోనియాగాంధీతో చిరంజీవి భేటీ వాయిదా పడింది. ఉదయం భేటీ మధ్యాహ్నం రెండుగంటలకు వాయిదా పడింది.