తెలంగాణ సాధన ఈవెంట్ ఆఫ్ ది ఇయర్: కాంగ్రెస్ నేత కేశవరావు

హైదరాబాద్: కేంద్రంలో అధికారంలో ఉన్న కాంగ్రెస్ పార్టీ తెలంగాణను ప్రకటిస్తే తెలంగాణ రాష్ట్ర సమితి అధ్యక్షుడు కె చంద్రశేఖరరావు టిఆర్ఎస్‌ను కాంగ్రెస్‌లో విలీనం చేస్తారనే విషయాన్ని తాను సాధారణంగానే అన్నానని సోమవారం కాంగ్రెస్ పార్టీ సీనియర్ నాయకుడు కె కేశవరావు వివరణ ఇచ్చుకున్నారు. కెసిఆర్ గతంలోనే తెలంగాణ ఇస్తే పార్టీని కాంగ్రెస్‌లో విలీనం చేస్తానని ప్రకటించారన్నారు. తన మాటలను కెసిఆర్ జోక్ ఆఫ్ ది ఇయర్ అన్నారని, అయితే తాను మాత్రం తెలంగాణ సాధించుకోవడాన్ని ఈవెంట్ ఆఫ్ ది ఇయర్ అంటున్నానని చెప్పారు.

తెలంగాణ రాష్ట్రాన్ని ఎలా సాధించుకోవాలో తమకు తెలుసునని చెప్పారు. కాగా అంతకుముందు కెసిఆర్ టీఆర్ఎస్ కాంగ్రెస్‌లో విలీనం అవుతుందన్న కె కేశవరావు వ్యాఖ్యలపై ఆగ్రహం వ్యక్తం చేశారు. ఆయన వ్యాఖ్యలు జోక్ ఆఫ్ ది ఇయర్ అన్నారు. కెకె ఎప్పుడు ఏం మాట్లాడుతారో తెలియదన్నారు. దానిపై కేశవరావు స్పందించారు.