చిరంజీవిలాగే కెసిఆర్ కాంగ్రెస్‌లో చేరడానికి సిద్ధం: ఎంపీ మధుయాష్కీ

న్యూఢిల్లీ: ప్రజారాజ్యం పార్టీని చిరంజీవి కాంగ్రెస్ పార్టీలో విలీనం చేయడం ద్వారా ప్రత్యేక తెలంగాణ రాష్ట్రానికి మార్గం మరింత సుగమం అయిందని నిజామాబాద్ పార్లమెంటు సభ్యుడు మధుయాష్కీ సోమవారం విలేకరులతో అన్నారు. ఆంధ్ర ప్రాంతంలో కాంగ్రెస్ పార్టీ బలోపేతానికి చిరంజీవి అవసరం ఎంతైనా ఉందన్నారు. అయితే ఆంధ్రలో చిరు పార్టీని బలోపేతం చేసినట్టుగానే తెలంగాణ ప్రాంతంలో కెసిఆర్‌ను కూడా పార్టీలో చేర్చించుకొని పార్టీ బలోపేతంపై పార్టీ అధిష్టానం దృష్టి సారించాలన్నారు. తెలంగాణ నిర్ణయం కాంగ్రెస్ అధిష్టానం చేతిలో ఉన్నదన్నారు.

నిర్ణయంతో చిరంజీవికి సంబంధం లేదన్నారు. చిరంజీవి కాంగ్రెస్‌లో ఒక వ్యక్తి కాబట్టి కాంగ్రెస్ అధిష్టానం నిర్ణయాలకు కట్టుబడి ఉండాలన్నారు. తెలంగాణపై కాంగ్రెస్ పార్టీ స్పష్టమైన ప్రకటన చేస్తే పార్టీలో చేరడానికి కెసిఆర్ సిద్ధంగా ఉన్నారన్నారు. తెలంగాణకు కేంద్రం అనుకూలంగా లేకుంటే ఆర్థిక మంత్రి ప్రణబ్ ముఖర్జీ నిర్వహించే అఖిలపక్షానికి తెలంగాణ నేతలు ఎవరూ రావడానికి సిద్ధంగా లేరని చెప్పారు. మధుయాష్కీ కాంగ్రెసు ఆంధ్రప్రదేశ్ వ్యవహారాల ఇంచార్జీ మొయిలీతో సోమవారం సమావేశమై తాజా రాజకీయాలపై చర్చించారు.