మార్పు కోసం మారిపోయా, ఇక కాంగ్రెస్ బలోపేతం చేద్దాం: చిరంజీవి

By Srinivas

Published: Tuesday, February 8, 2011, 17:08 [IST]

హైదరాబాద్: మార్పు కోసమే తాను మారానని చిరంజీవి మంగళవారం శంషాబాద్ విమానాశ్రయంలో అభిమానులను కాంగ్రెస్ పార్టీ కార్యకర్తలను, అభిమానులను ఉద్దేశించి చెప్పారు. ప్రజారాజ్యం పార్టీని కాంగ్రెస్‌లో విలీనం చేస్తున్నట్టు న్యూఢిల్లీలో ప్రకటించిన అనంతరం చిరంజీవి మొదటిసారి హైదరాబాదుకు చేరుకున్నారు. ఈ సందర్భంగా ఆయన మాట్లాడారు. అందరికీ న్యాయం చేయాలన్న సదుద్దేశ్యంతోనే కాంగ్రెస్ పార్టీలో పీఆర్పీని విలీనం చేశానని చెప్పారు. కాంగ్రెస్ పార్టీలో ఉన్నప్పటికీ ప్రజా సమస్యలను నేనే ముందుగా లేవనెత్తుతానని చెప్పారు. రాష్ట్రంలో కాంగ్రెస్‌కు అండగా ఉండమని ఏఐసిసి అధ్యక్షురాలు సోనియాగాంధీ అడిగారని చెప్పారు.

ప్రజా సమస్యలను పరిష్కరించేందుకు పూర్తి మద్దతు ఇస్తానని సోనియా హామీ ఇచ్చారని చెప్పారు. కాంగ్రెస్‌లో విలీనం అయినంత మాత్రాన ప్రజలకు దూరం కానని అన్నారు. విలీనం స్వలాభం కోసం కాదని చెప్పారు. గత ఎన్నికల్లో బిసిలకు ప్రాధాన్యం ఇచ్చి 104 సీట్లు కేటాయించిన ఘనత పీఆర్పీదే అన్నారు. ఇకనుండి కాంగ్రెస్‌ను బలోపేతం చేద్దామని పిలుపునిచ్చారు. బడుగు, బలహీన వర్గాలకు న్యాయం చేయడం కోసమే కాంగ్రెస్‌లో చేరినట్టు తెలిపారు. నాకు స్వాగతం పలికేందుకు వచ్చిన మిమ్మలను చూస్తుంటే నాకు అందరూ అండగా ఉన్నారనే నమ్మకం కలిగిందన్నారు.

Published On February 8, 2011