ఎబిఎన్ ఆంధ్రజ్యోతి ఛానల్‌కు జగన్ వర్గం ఎమ్మెల్యే కొండా సురేఖ సవాల్

By Srinivas

Published: Wednesday, February 9, 2011, 16:41 [IST]

వరంగల్: తాను పిసిసి అధ్యక్షుడు డి శ్రీనివాస్‌తో మంతనాలు జరిపినట్టు, మాజీ పార్లమెంటు సభ్యుడు జగన్మోహన్ రెడ్డికి దూరమవుతున్నట్టు ఎబిఎన్ ఆంధ్రజ్యోతి న్యూస్ ఛానల్‌లో వచ్చిన వార్తల పట్ల మాజీ మంత్రి కొండా సురేఖ బుధవారం తీవ్రస్థాయిలో ఆగ్రహం వ్యక్తం చేశారు. ఎబిఎన్ ఛానల్ రేటింగ్ పెంచుకోవడానికే ఇలాంటి అవాస్తవ వార్తలు ప్రచురిస్తుందని ఆరోపించారు. మొదట డిఎస్‌తో మంతనాలు అని వేశారని ఆ తర్వాత జగన్ వర్గానికి దూరం అవుతున్నట్టు వార్తలు వేసింది. సోనియాకు రాసిన లేఖ కూడా తాను రాసింది కాదని చెప్పడాన్ని ఖండించారు.

జగన్ నన్ను బెదిరింపులకు, ఒత్తిళ్లకు గురిచేస్తున్నారనే వార్తల్లో ఎలాంటి వాస్తవం లేదన్నారు. మేం ఎవరి ఒత్తిళ్లకు లొంగమన్నారు. జగన్ ఒత్తిళ్లకు లొంగి మేం ఆయన వెంట వెళ్లడం లేదన్నారు. మా మనస్సాక్షి చెప్పినట్టే మేం నడుచుకుంటామని స్పష్టం చేశారు. ఎబిఎన్ ఆంధ్రజ్యోతి ఛానల్ ఎండి రాధాకృష్ణ గురించి అందరికీ తెలుసునని, కానీ తాను వ్యక్తిగతంగా ఎవరినీ విమర్శించాలని అనుకోవడం లేదని చెప్పారు. అయితే ఎబిఎన్ ఛానల్ తనపై చేసిన వార్తలు వాస్తవాలేనని నిరూపించడానికి సిద్ధపడితే వరంగల్ వదిలి వెళ్లడమే కాకుండా రాజకీయాలకు స్వస్తీ పలుకుతానని, నిరూపించకుంటే వారు ఛానల్‌ను మూసేసుకుంటారా అని సవాల్ విసిరారు.

Published On February 9, 2011