కుటుంబ సభ్యులతో జగన్ భేటీ: కొత్త పార్టీ, ఉప ఎన్నికలపై చర్చ!

హైదరాబాద్: కొత్త పార్టీ, కడప పార్లమెంటు, పులివెందుల అసెంబ్లీ ఉప ఎన్నికల నేపథ్యంలో మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్ రెడ్డి తన కుటుంబ ప్రముఖులతో మంగళవారం వైయస్ ప్రకాశ్ రెడ్డి ఇంట్లో సమావేశమయ్యారు. కడప పార్లమెంటు అభ్యర్థిగా జగన్, పులివెందుల అభ్యర్థిగా విజయమ్మ దాదాపు ఖాయమయినట్టే. జగన్‌కు పోటీగా ఆయన బాబాయ్, వ్యవసాయ శాఖమంత్రి వైయస్ వివేకానందరెడ్డి అల్లుడు నర్రెడ్డి రాజశేఖరరెడ్డి నిలబెట్టే సూచనలు కనిపిస్తున్నాయి. విజయమ్మపైన కూడా వివేకా దాదాపు ఖరారైపోయింది.

రెండు చోట్ల నలుగురు అభ్యర్థులు ఒకే కుటుంబ సభ్యులు కాబట్టి తమకు మద్దతు ఇవ్వవల్సిందిగా కుటుంబ సభ్యులతో గతంలోనే సమావేశమై కోరారు. అప్పుడు మద్దతు కోరిన జగన్ తాజాగా తాను ఉప ఎన్నికలకుముందు మార్చిలో ప్రకటించబోయే పార్టీ ఆవిర్భావ సదస్సు ఏర్పాట్లపైన కూడా చర్చించినట్లుగా తెలుస్తోంది. ఉప ఎన్నికల్లో అనుసరించాల్సిన వ్యూహంపై వారితో చర్చించినట్లుగా సమాచారం. జగన్‌ను, విజయమ్మను భారీ ఆధిక్యంతో గెలిపించి వైయస్ కుటుంబం ఆధిక్యాన్ని నిలబెట్టాలనే నిర్ణయానికి వారు వచ్చినట్లు తెలుస్తోంది. ఈ భేటీలో వైయస్ మనోహర్ రెడ్డి, ఆనంద్ రెడ్డి, ప్రకాశ్ రెడ్డి తదితరులు హాజరయ్యారు. వీరిని ఒక్కొక్కరిని ఒక్కో మండలానికి ఇన్‌ఛార్జ్‌గా నియమించి జగన్‌ను గెలిపించాలని అనుకుంటున్నారు.

English summary

Ex Member of Parliament YS Jaganmohan Reddy met with his family members on tuesday at YS Prakash Reddy residence in Kadapa district. He talked about launching of new party and by elections of Pulivendula and Kadapa.