చిరంజీవి సామాజిక న్యాయంపై వైయస్ జగన్ కామెంట్స్

By Pratap

Published: Friday, February 18, 2011, 18:10 [IST]

హైదరాబాద్: సామాజిక న్యాయం సాధించడానికే కాంగ్రెసు పార్టీలో తన పార్టీని విలీనం చేస్తున్నానని చెప్పిన ప్రజారాజ్యం పార్టీ అధ్యక్షుడు చిరంజీవిపై మాజీ పార్లమెంటు సభ్యుడు వైయస్ జగన్ తీవ్ర వ్యాఖ్యలు చేశారు. ఫీజు రీయంబర్స్‌మెంట్ చెల్లింపుల కోసం దీక్ష చేపట్టిన ఆయన శుక్రవారం సాయంత్రం ప్రసంగించారు. అయితే, చిరంజీవి పేరు గానీ కాంగ్రెసు పార్టీ పేరు గానీ ఆయన ప్రస్తావించలేదు. సామాజిక న్యాయం కోసం ఆ పార్టీలో చేరుతానని ఒకరు, సామాజిక న్యాయం కోసమే ఆ నాయకుడిని ఇక్కడికి తీసుకున్నామని ఓ పార్టీ చెబుతుంటే పేదల పెదవులపై చిరునవ్వు తెలేని ఈ ప్రభుత్వానికి సామాజిక న్యాయం సాధించే చిత్తశుద్ధి ఉందా అనే అనుమానం వేస్తోందని ఆయన అన్నారు. సామాజిక న్యాయంపై అబద్దాలు చెబుతున్న ఈ ప్రభుత్వానికి పాలించే అర్హత లేదని ఆయన అన్నారు.

పేదలను వారి మానానికి వారిని వదిలేస్తున్న ప్రభుత్వాన్ని కొనసాగించాల్సిన బాధ్యత తమపై లేదని ఆయన అన్నారు. ఫీజుల రీయంబర్స్‌మెంట్ చెల్లించి విద్యార్థులను ఆదుకోవాలని ప్రభుత్వానికి హెచ్చరిక జారీ చేస్తున్నానని ఆయన అన్నారు. హెచ్చరిక జారీ చేస్తున్నాననే వ్యాక్యాన్ని ఆయన రెట్టించారు. ఫీజు రీయంబర్స్‌మెంట్ కింద 3400 కోట్ల రూపాయలు చెల్చించాల్సి ఉండగా వేయి కోట్ల రూపాయలు విడుదల చేస్తామని ప్రభుత్వం చెబుతోందని, అది ముష్టి వేయడమేనని ఆయన అన్నారు. ఈ ఆర్థిక సంవత్సరం అయిపోవస్తోందని, మళ్లీ బడ్జెట్ పెట్టబోతున్నారని, మళ్లీ బడ్జెట్‌లో 3400 కోట్ల రూపాయలు కేటాయించాల్సి ఉంటుందని, 2000 వేల కోట్ల బకాయిలతో పాటు 3400 కోట్ల రూపాయల ఎలా విడుదల చేస్తారని ఆయన అన్నారు. దీన్నిబట్టి చూస్తే పథకాన్ని నాశనం చేసే ఆలోచన ప్రభుత్వం చేస్తోందని అనిపిస్తోందని ఆయన అన్నారు.

ఈ ప్రభుత్వానికి బంగళాఖాతంలో పడే స్థాయి కూడా లేదని, ఇదే పరిస్థితి కొనసాగితే ఈ ప్రభుత్వానికి డిపాజిట్లు కూడా లేదని, ప్రభుత్వాన్ని వేస్తే బంగాళాఖాతం కూడా కలుషితం అవుతుందని ఆయన అన్నారు. విద్యార్థులను ఆదుకోవడానికే తాను వారం రోజుల పాటు దీక్షను కొనసాగిస్తున్నానని, అలాగైనా ప్రభుత్వం స్పందిస్తుందేమోనని అనుకుంటున్నానని ఆయన అన్నారు.

Published On February 18, 2011