ప్రభుత్వం కుప్ప కూలుతుంది!: జగన్ వర్గం ఎమ్మెల్యే కొండా సురేఖ

By Srinivas

Published: Monday, February 21, 2011, 16:43 [IST]

హైదరాబాద్: ప్రభుత్వం విద్యార్థుల ఫీజు రీయింబర్సుమెంట్సును వెంటనే చెల్లించకుంటే ముఖ్యమంత్రి కిరణ్‌కుమార్ రెడ్డి ప్రభుత్వం కుప్పకూలుతుందని మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెస్ శాసనసభ్యురాలు కొండా సురేఖ సోమవారం అన్నారు. సురేఖ అసెంబ్లీ సమావేశాలు వాయిదా పడిన అనంతరం జగన్ దీక్ష చేస్తున్న వరలక్ష్మి ప్రాంగణానికి వచ్చి ప్రసంగించారు. విద్యార్థులు అంతా ఏకమై ఉప్పెన సృష్టించి ఆ ఉప్పెనలో ప్రభుత్వాన్ని కుప్ప కూల్చాలని కోరారు. అసెంబ్లీలో ఈ రోజు పెట్టిన సెక్యురిటీని గతంలో ఎప్పుడూ పెట్టలేదన్నారు. ఇంత సెక్యూరిటీని పెట్టుకొని అసెంబ్లీని నడపాల్సిన ఖర్మ ఏం పెట్టిందన్నారు.

సిఎం కిరణ్‌ కుమార్ రెడ్డి ప్రభుత్వం ప్రజల విశ్వాసం కోల్పోయిందన్నారు. జగన్ చేస్తున్న దీక్ష ఆయన వ్యక్తిగతం కోసం కాదన్నారు. రాష్ట్ర ప్రజల ఆకాంక్ష కోసం ఆయన దీక్షను చేపట్టారన్నారు. జగన్ దీక్షతో ప్రభుత్వం దిగి రావాలన్నారు. విద్యార్థులకు ఫీజు రీయింబర్సుమెంట్స్ ఇస్తుందా లేదా చెప్పాలన్నారు. విద్యార్థులకు ఫీజు రీయింబర్సుమెంట్సు ఇవ్వకుంటే ప్రభుత్వం కుప్పకూలుతుందని హెచ్చరించారు.

Published On February 21, 2011