నాగంను బయటకు పంపించడానికి చంద్రబాబు కుట్ర: హరీష్‌ రావు

By Srinivas

Published: Monday, March 7, 2011, 14:43 [IST]

హైదరాబాద్: తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు తెలుగుదేశం పార్టీనుండి తెలంగాణవాదులను బయటకు పంపించే కుట్రలు చేస్తున్నారని తెలంగాణ రాష్ట్ర సమితి సిద్దిపేట శాసనసభ్యుడు హరీష్‌రావు సోమవారం అన్నారు. తెలంగాణ కోసం పార్టీలో ఉండి ఒంటరిగా పోరాటం చేస్తున్న ఎమ్మెల్యే నాగం జనార్ధన్ రెడ్డిని కూడా పార్టీనుండి బయటకు పంపించేందుకు ప్రయత్నాలు చేస్తున్నారన్నారు. నాగం పార్టీనుండి బయటకు వస్తే మేం సాదరంగా ఆహ్వానిస్తామన్నారు. నాగం వెంట నాలుగు కోట్ల మంది తెలంగాణ ప్రజలు ఉన్నారన్నారు.

తెలంగాణపై ఇప్పటికైనా టిడిపి ఒక స్పష్టమైన నిర్ణయం తీసుకోవాలని డిమాండ్ చేశారు. టిడిపి తెలంగాణ ఎమ్మెల్యేలు మరో మూడేళ్లు ఎమ్మెల్యేలుగా ఉంటారు. కానీ ఆ తర్వాత వారికి మనుగడ ఉండదని హెచ్చరించారు. సీమాంధ్ర ఎమ్మెల్యేలు శాసనసభలో ప్లకార్డులు పట్టుకొని సమైక్యాంధ్ర నినాదాలు చేస్తున్నప్పుడు వారించని చంద్రబాబు తెలంగాణవాదులను మాత్రం వారిస్తున్నారన్నారు.

Published On March 7, 2011