నాగం జనార్దన్ రెడ్డిపై ఆనాడు దాడి, ఈనాడు ఆలింగనాలు

By Pratap

Published: Monday, March 7, 2011, 14:49 [IST]

హైదరాబాద్: ఉస్మానియా విశ్వవిద్యాలయంలో ఆందోళన సాగిస్తున్న విద్యార్థులకు మద్దతు తెలపడానికి వెళ్లిన తెలుగుదేశం తెలంగాణ ప్రాంత శాసనసభ్యుడు నాగం జనార్దన్ రెడ్డి ఆనాడు దాడికి గురయ్యారు. ఉస్మానియా విశ్వవిద్యాలయంలో ఆయనపై కొంత మంది దాడి చేశారు. ఈ దాడిలో ఆయన తీవ్రంగా గాయపడడమే కాకుండా దిగ్భ్రాంతికి గురయ్యారు. ఎవరు అవునన్నా కాదన్నా చంద్రబాబునాయుడే తమ నాయకుడని అప్పట్లో ఉస్మానియా విద్యాలయంలో విద్యార్థుల మధ్య అన్నారు. దాంతో ఆగ్రహించిన తెలంగాణవాదులు ఆయనపై దాడి చేశారు. అప్పటి నుంచి ఆయన తెలంగాణకు పూర్తి అనుకూలంగా మారినట్లు చెబుతారు. క్రమంగా ఆయన తెలుగుదేశంలో వీర తెలంగాణవాదిగా తయారయ్యారు. అయినా చాలా కాలం వరకు చంద్రబాబుకు మద్దతిస్తూనే వచ్చారు. కానీ ఇటీవలి కాలంలో పరిస్థితులు పూర్తిగా మారిపోయాయి. చంద్రబాబుతో ఆయనకు పొసగని వాతావరణం ఏర్పడింది.

చంద్రబాబుతో విభేదాలు, మిగతా తెలంగాణ శాసనసభ్యులను తనపై చంద్రబాబు రెచ్చగొట్టడం వంటి పరిణామాల నేపథ్యంలో ఆయన తెలంగాణకు పూర్తి మద్దతుగా నిలిచారు. తెలంగాణ అంశంపై పోచారం శ్రీనివాస రెడ్డితో కలిసి ఆయన శాసనసభా సమావేశాలను అడ్డుకున్నారు. ఈ స్థితిలో చంద్రబాబు వెంట ఉన్న తెలుగుదేశం తెలంగాణ ప్రాంత శానసశభ్యులు నాగం జనార్దన్ రెడ్డిపై తీవ్ర వ్యాఖ్యలు చేశారు. ఎర్రబెల్లి దయాకర రావు మాత్రం ఈ సంఘటనకు పూర్తిగా దూరంగానే ఉన్నారు. చంద్రబాబును వ్యతిరేకిస్తూ తెలంగాణ కోసం ముందుకు రావడంతో నాగం జనార్దన్ రెడ్డికి తెలంగాణవాదుల నుంచి పూర్తి మద్దతు లభించింది. నాగం జనార్దన్ రెడ్డికి మద్దతుగా అదే ఉస్మానియా విశ్వవిద్యాలయంలో ర్యాలీ జరిగింది. ఆనాడు వ్యతిరేకించినవారే ఈనాడు ఆయనకు అండగా నిలబడ్డారు. తెలంగాణ న్యాయవాదులతో సహా తెలంగాణవాదులంతా ఆయన మద్దతిస్తున్నారు.

Published On March 7, 2011