ఉద్యోగినిపై లైంగిక వేధింపులు: చితకబాదిన గ్రామస్తులు

By Srinivas

Published: Monday, March 7, 2011, 15:16 [IST]

కర్నూలు: ఓ ఉద్యోగినిపై లైంగిక వేధింపులకు పాల్పడినందుకు గ్రామస్తులు ఓ వ్యక్తిని తీవ్రంగా చితకబాదిన సంఘటన కర్నూలు జిల్లా నందికొట్కూరు మండలం కొణిదెల గ్రామంలో సోమవారం చోటు చేసుకుంది. ఆంధ్రాబ్యాంక్‌లో ఫీల్డ్ ఆఫీసర్‌గా పని చేస్తున్న ఉదయ్‌కుమార్ అనే వ్యక్తి వాణి అనే మహిళా ఉద్యోగినిపై గత కొంతకాలంగా లైంగిక వేధింపులకు పాల్పడుతున్నారు. ఇందులో భాగంగా రెండు రోజుల క్రితం ఉదయ్ వాణి చేయి పట్టుకోగా బ్యాంక్ మేనేజర్ ఆయనను తీవ్రంగా మందలించినట్లుగా తెలుస్తోంది. మరోసారి ఇలాంటి చర్యలకు పాల్పడవద్దని మేనేజర్ హెచ్చరించినట్లుగా తెలుస్తోంది. ఆమెపై బూటుతో దాడి చేసినట్టుగా చెబుతున్నారు.

అయితే ఉదయ్ మరోసారి సోమవారం ఆమెతో అసభ్యంగా ప్రవర్తించడంతో వాణి గ్రామస్తులకు ఫిర్యాదు చేసింది. దీంతో రెచ్చిపోయిన గ్రామస్తులు ఉదయ్‌ను పట్టుకొని చితకబాదారు. వాణితో చెంపలు వాయింపజేశారు. గతంలో వాణిపై లైంగిక వేధింపులకు పాల్పడ్డ ఉదయ్ తనకు లొంగి పోవాలని ఎన్ని డబ్బులైనా ఇస్తానని, లేదంటే చంపివేస్తానని కూడా హెచ్చరించినట్లుగా తెలుస్తోంది. కాగా ఇలాంటి అధికారుల వల్ల బ్యాంకుకు చెడ్డపేరు వస్తుందని ఇలాంటి వారిని కఠినంగా శిక్షించాలని ఉద్యోగులు కోరుతున్నారు. కాగా ఉదయ్‌పై పోలీసులు కేసు నమోదు చేశారు.

Published On March 7, 2011