అందరం కలిసే ఉన్నాం, తెంలగాణ పోరు ఆగదు: నాగం

By Pratap

Published: Tuesday, March 8, 2011, 12:26 [IST]

హైదరాబాద్: తమ పార్టీ తెలంగాణ ప్రాంత శాసనసభ్యులమంతా కలిసే ఉన్నామని, కలిసే తెలంగాణ పోరాటం చేస్తామని తెలుగుదేశం తెలంగాణ ఫోరం కన్వీనర్ నాగం జనార్దన్ రెడ్డి చెప్పారు. మిలియన్ మార్చ్‌లో పాల్గొనాలని, ఈ నెల 10వ తేదీ వరకు శాసనసభా సమావేశాలను బహిష్కరించాలని నిర్ణయించుకున్నామని, ఈ విషయాన్ని తమ పార్టీ అధ్యక్షుడు నారా చంద్రబాబు నాయుడికి చెప్పామని, చంద్రబాబు అందుకు అంగీకరించారని ఆయన మంగళవారం మీడియా ప్రతినిధుల సమావేశంలో వివరించారు. తెలంగాణవాదాన్ని వీడేది లేదు, పోరాటాన్ని ఆపేది లేదని ఆయన స్పష్టం చేశారు. తెలంగాణ రాష్ట్రం ఏర్పాటయ్యే వరకు తమ పోరాటం ఆగదని ఆయన చెప్పారు.

పార్టీ తెలంగాణ ఫోరం పోరాటం సాగుతుందని ఆయన చెప్పారు. మిలియన్ మార్చ్‌కు మద్దతుగా తెలంగాణ మంత్రులు ఈ నెల 10వ తేదీ వరకు శాసనసభా సమావేశాలను బహిష్కరించాలని ఆయన డిమాండ్ చేశారు. తెలంగాణపై కాంగ్రెసు అధ్యక్షురాలు సోనియా గాంధీని కలవడానికి ఢిల్లీ వెళ్తామని తెలంగాణ మంత్రులు అంటున్నారని, తెలంగాణపై స్పష్టమైన హామీ లభించకపోతే వారు రాజీనామాల లేఖలను సోనియాకు ఇవ్వకుండా ఇక్కడికి వచ్చి గవర్నర్‌కు ఇవ్వాలని ఆయన అన్నారు. కాంగ్రెసు తెలంగాణ శాసనసభ్యులు సభను బహిష్కరిస్తున్నప్పుడు తెలంగాణ మంత్రులు సభలో ఉండడం సరి కాదని ఆయన అన్నారు. కాంగ్రెసు నాటకాలు కట్టిపెట్టి పార్లమెంటులో బిల్లు ప్రతిపాదించాలని ఆయన డిమాండ్ చేశారు. తెలంగాణపై కేంద్ర ప్రభుత్వం తాత్సారం చేయడం సరి కాదని ఆయన అన్నారు.

Published On March 8, 2011