హసన్ అలీపై తీవ్రవాద కేసు నమోదు: సుప్రీంకోర్టు ఆదేశం

By Pratap

Published: Tuesday, March 8, 2011, 15:03 [IST]

న్యూఢిల్లీ: దాదాపు 40 కోట్ల రూపాయల మేరకు పన్ను ఎగవేసిన హాసన్ అలీపై తీవ్రవాద కేసు నమోదు చేయాల్సిందిగా దేశ అత్యున్నత న్యాయస్థానమైన సుప్రీంకోర్టు మంగళవారం ఆదేశించింది. దేశ సంపదను నల్లధనం పేరుతో విదేశీ బ్యాంకులకు తరలించి, కోట్లాది రూపాయల మేరకు పన్ను ఎగవేసిన హాసన్ ఆలీ కేసులో కోర్టు తీవ్రంగా స్పందించింది. ఆలీపై తీవ్రవాద కేసులు నమోదు చేయాలని ధర్మానసం మంగళవారం సీబీఐని ఆదేశించింది. హసన్ అలీకి అన్ని పాస్‌పోర్టులు ఎలా లభించాయని సుప్రీంకోర్టు బెంచ్ ప్రశ్నించింది. దీనిపై విచారణ జరపాలని సీబీఐ అధికారులను బెంచ్ ఆదేశాలు జారీ చేసింది.

దేశ భద్రత దృష్ట్యా హసన్‌పై పోకా కేసు ఎందుకు నమోదు చేయకూడదని ప్రశ్నించింది. హాసన్ కేసు దర్యాప్తు పురోగతిపై పూర్తి సమాచారంతో కూడిన నివేదికను సమర్పించాలని ఎన్‌ఫోర్స్‌మెంట్ డైరక్టరేట్‌ను సుప్రీంకోర్టు కోరడం గమనార్హం. ఎన్‌ఫోర్స్‌మెంట్ డెరైక్టరేట్ సోమవారం అలీని అదుపులోకి తీసుకుంది. ఆయన అనారోగ్యం పాలుకావడంతో ముంబైలోని జేజే ఆస్పత్రిలో వైద్య పరీక్షలు చేయిస్తున్నారు.

Published On March 8, 2011