2జి స్పెక్ట్రమ్ కుంభకోణంలో కనిమొళిని ప్రశ్నించిన సిబిఐ

By Pratap

Published: Friday, March 11, 2011, 16:32 [IST]

చెన్నై: 2జి స్పెక్ట్రమ్ కుంభకోణంలో కేంద్ర దర్యాప్తు సంస్థ (సిబిఐ) శుక్రవారం తమిళనాడు ముఖ్యమంత్రి కరుణానిధి కూతురు కనిమొళిని ప్రశ్నించింది. డిఎంకె పార్లమెంటు సభ్యురాలు కూడా అయిన ఆమెను ప్రశ్నించడానికి సిబిఐ అధికారులు శుక్రవారం ఉదయం నగరానికి చేరుకున్నారు. 2జి స్పెక్ట్రమ్ కుంభకోణంలో చార్జిషీట్ దాఖలు చేయడానికి సిబిఐకి ఈ నెలాఖరు వరకు గడువు ఉంది. 2జి స్పెక్ట్రమ్ కుంభకోణానికి సంబంధించి కలైంగర్ టీవీ డబ్బుల లావాదేవీలకు సంబంధించి సిబిఐ అధికారులు కనిమొళిని ప్రశ్నించారు.

కరుణానిధి కుటుంబ సభ్యులకే ఆ టీవీ చానెల్‌లో ఎక్కువ వాటాలున్నాయి. ఇందులో కళిమొనికి 20 శాతం వాటా ఉండగా, కరుణానిధి భార్య ఎంకె దయాళుకు 60 శాతం వాటా, చానెల్ మేనేజింగ్ డైరెక్టర్ శరత్ కుమార్‌కు 20 శాతం వాటాలున్నాయి. 2జి స్కామ్‌లో నిందితుడు టెలికం మాజీ మంత్రి ఎ. రాజా ప్రస్తుతం జ్యుడిషియల్ కస్టడీలో ఉన్నారు. కార్పొరేట్ లాబీయిస్టు నీరా రాడియాతో కనిమొళి జరిపిన టెలిఫోన్ సంభాషణలను సిబిఐ అధికారులు రికార్డు చేశారు. తమిళనాడు అసెంబ్లీ ఎన్నికలు జరుగుతున్న ప్రస్తుత తరుణంలో కనిమొళిని సిబిఐ అధికారులు తన కూతురు కనిమొళిని ప్రశ్నించడం కరుణానిధికి ఇబ్బందేనని భావిస్తున్నారు.

Published On March 11, 2011