వైయస్ జగన్‌ను చంపుతామంటూ అంబటి రాంబాబుకు లేఖ

గుంటూరు: వైయస్సార్ కాంగ్రెసు పార్టీ నేత వైయస్ జగన్‌ను చంపేస్తామంటూ ఓ లేఖ వచ్చింది. ఈ లేఖ వైయస్ జగన్ వర్గానికి చెందిన నాయకుడు అంబటి రాంబాబుకు వచ్చింది. వైయస్ జగన్‌ను చంపేస్తామంటూ తనకు లేఖ వచ్చిందని అంబటి రాంబాబు మంగళవారం మీడియా ప్రతినిధులతో చెప్పారు. ఈ లేఖలో సైనైడ్‌ను పోలిన స్ఫటికపు బిళ్లలు ఉన్నాయని ఆయన చెప్పారు. దీనిపై తాను జిల్లా పోలీసు సూపరింటిండెంట్ (ఎస్పీ)కి ఫిర్యాదు చేసినట్లు ఆయన తెలిపారు. సంబంధిత పోలీసు స్టేషన్‌లో కూడా ఫిర్యాదు చేసినట్లు ఆయన తెలిపారు.

సంబంధిత సర్కిల్ ఇన్‌స్పెక్టర్‌కు లేఖను, వివరాలను అందించినట్లు ఆయన తెలిపారు. ఈ బెదిరింపు లేఖను 99 శాతం ఆకతాయి ఎవరైనా రాసి ఉండవచ్చునని, ఒక శాతం మాత్రమే నిజం ఉందని నమ్ముతున్నానని ఆయన చెప్పారు. అయితే, ముందు జాగ్రత్తగానే తాను పోలీసులకు ఫిర్యాదు చేసినట్లు ఆయన తెలిపారు. దీనిపై పోలీసులు దర్యాప్తు ప్రారంభించారు.

English summary

YSR Congress party leader Ambati Rambabu recieved a threating letter, in which it was warned that YS Jagan will be killed. Ambati Rambabu said that he made complaint to the police on this letter.